Kanadaning toronto, kalgéri, wankowér sheherliride Uyghur mesilisi anglitilghan

Muxbirimiz méhriban
2020-01-22
Élxet
Pikir
Share
Print
Amérikadiki "Uyghur herikiti" teshkilatining bashliqi roshen abbas xanim we d u q bash teptishi ablikim idris ependi Uyghur diyaridiki jaza lagérlirining jaylishish ornini éniqlap chiqqan xitay pa'aliyetchisi shawn janggha rehmitini bildürdi. 2020-Yili yanwar, kanada.
Amérikadiki "Uyghur herikiti" teshkilatining bashliqi roshen abbas xanim we d u q bash teptishi ablikim idris ependi Uyghur diyaridiki jaza lagérlirining jaylishish ornini éniqlap chiqqan xitay pa'aliyetchisi shawn janggha rehmitini bildürdi. 2020-Yili yanwar, kanada.
RFA/Méhriban

Amérikadiki "Uyghur herikiti" teshkilatining bashliqi roshen abbas xanim kanadadiki IDRF, yeni "Musulmanlar xeyri-saxawet jem'iyiti" ning orunlashturushi bilen kanadaning toronto, kalgéri qatarliq sheherliride doklat bergen.

U mezkur doklat bérish yighinlirida Uyghur pa'aliyetchilirining xitay hökümitining Uyghurlargha qaratqan siyasiy basturushi heqqide söz qilghanliqini, yighin ehlining bu doklatlargha qarita inkasining küchlük bolghanliqini we yighin'gha qatnashqan siyasiy erbablarning Uyghurlar üchün qandaq yardem bérish mesilisini birdek otturigha quyghanliqini bildürdi.

Dunya Uyghur qurultiyining bash teptishi ablikim idris ependi bu qétim kanadaning toronto, kalgéri, wankowér sheherliride élip bérilghan pa'aliyetlerning emili ünümining yuqiri bolghanliqini tekitlep ötti.

Ablikim idris ependining bildürüshiche, kanadaning toronto, kalgéri qatarliq jaylirida ötküzülgen doklat bérish yighinlirida yene muhajirettiki Uyghurlar üchün i'ane toplash, Uyghurlarni basturushta jawabkarliqi bolghan xitay emeldarlirigha qarita "Magnétiski qanuni" boyiche jazalash tedbirliri qollinishni telep qilish, dunya Uyghur qurultiyining nöwettiki pa'aliyetlirini kanadadiki Uyghur jama'itige anglitish qatarliq témilar boyichimu melumatlar bérilgen iken.

Dunya Uyghur qurultiyining muhajirlar ishlirigha mes'ul xadimi memet toxti ependi toronto we kalgéri ölkiliride élip bérilghan pa'aliyetlerde türkiye qatarliq döletlerde yashawatqan Uyghurlargha iqtisadiy jehettin yardemde bolush, ularning kanadagha köchmen bolup kélishige yardem bérish qatarliq mesililerning otturigha qoyulghanliqini bildürdi.

"Uyghur herikiti" teshkilatining bashliqi roshen abbas xanim yene 21-yanwar küni kanadaning wankowér shehiride kanadadiki ammiwi teshkilat rehberliri we bir qisim hökümet erbablirining qatnishishida xitayning xongkong, teywen, Uyghur, tibet siyasitige qarita qandaq tedbir qollinish heqqide yépiq shekildiki yumilaq üstel yighini ötküzülgenlikini bayan qildi. U yene shu küni kechte "Xongkonggha yardem teshkilati" ning orunlashturushida wankowérdiki biritaniye kolumbiyesi uniwérsitétining kutupxanisida Uyghurlarning weziyiti heqqide doklat bérish yighini ötküzülgenlikini bildürdi.

Ablikim idris ependi we roshen abbas xanimlarning bayanigha qarighanda, ular özlirining kanada ziyaritide yene Uyghur diyaridiki jaza lagérlirining jaylishish ornini éniqlap chiqqan xitay pa'aliyetchisi shawn jangnimu ziyaret qilghan. Uchrishishta ular xoten qatarliq jaylardiki lagérlar etrapida yéngidin tesis qilin'ghan emgek lagérlirining orni heqqide muzakirilerde bolghan.

Roshen abbas xanim "Uyghur herikiti" teshkilati namidin shawn jang ependige lewhe teqdim qilip, Uyghurlarning unigha bolghan minnetdarliqini bildürgen.

Toluq bet