Канаданиң "ирқий қирғинчилиқ" қарариға һәмдә б д т да оттуриға қоюлған уйғурлар мәсилисигә нисбәтән қарашлар

Ихтиярий мухбиримиз әкрәм
2021-02-24
Share
Канаданиң Канада баш министири җастин трудо парламент бинасидики авам палатасида сөзл қилмақта. 2020-Йили 13-март, оттава, канада.
AFP

23-Феврал күнидин буян ғәрб мәтбуатлирида канада парламентида 22-феврал қобул қилинған уйғурларға мунасивәтлик "ирқий қирғинчилиқ" қарари муһим тема сүпитидә орун алмақта. Шуниң билән биргә, әнгилийә башлиқ ғәрб әллириниң б д т кишилик һоқуқ кеңишиниң 46-нөвәтлик йиғинида оттуриға қойған уйғурларға аит пикирләр диққәтни тартмақта. Д у қ 22-феврал дәрһал ахбарат елан қилип, канада һөкүмитиниң қарарини қарши алидиғанлиқини билдүргән иди.

Муһаҗирәттики уйғур сиясий актиплириниң бу һадисиләргә қарита қарашлири қандақ?

Д у қ рәиси долқун әйса әпәнди бу һәқтә тохталғанда, канада парламентиниң уйғурларға йүргүзүлүватқан зулумни "ирқий қирғинчилиқ" дәп етирап қилишиниң пүткүл инсанийәт үчүн зор тарихий бир вәқә болғанлиқини тәкитлиди. У сөзидә мәзкур қарарниң сабиқ америка ташқий ишлар министери майик помпейо "ирқий қирғинчилиқ" ни җакарлиғандин кейинки хәлқарада барлиққа кәлгән йәнә бир илгириләш һесаблинидиғанлиқини әскәртти. Долқун әйса әпәнди йәнә б д т кишилик һоқуқ кеңишиниң 46-нөвәтлик йиғинида бир қисим ғәрб демократик дөләтлириниң уйғурлар мәсилисини кәскин тәләппузларда оттуриға қоюватқанлиқ мәсилисигә нисбәтәнму көз қарашлирини ипадә қилип өтти.

Түркийә һаҗитәпә университетиниң оқутқучиси, д у қ ниң муавин рәиси, истратегийә мутәхәссиси доктур әркин әкрәм әпәндиму канада парламентиниң бу қарариға юқири баһа бәрди. У сөзидә мәзкур қарарниң бундин кейин канада һөкүмити тәрипидин конкирет қандақ иҗра қилинишиниң техиму муһим мәсилә икәнликини тилға алди.

Д у қ ниң муавин рәиси, уйғур зиялийси пәрһат муһәммиди әпәнди бу һәқтә тохталғанда, канада парламентиниң уйғурларға аит "ирқий қирғинчилиқ" қарариниң ғәрб мәтбуатлириниң қизиқ темисиға айланғанлиқини изһар қилди. У сөзидә йәнә бу қарарниң нөвәттики б д т йиғинлириғиму тәсир көрситиватқанлиқини, кәлгүсидә башқа дөләтләргиму үлгә болуш ролини ойнайдиғанлиқини илгири сүрди.

Канада парламентида мәзкур қарарниң қобул қилиниши үчүн зор әҗирләр сәрп қилған канададики уйғур зиялиси, д у қ муһаҗирлар комитетиниң мәсули мәмәт тохти әпәндиму зияритимизни қобул қилип, "ирқий қирғинчилиқ" қарариниң қобул қилиниш җәряни вә униң әһмийити тоғрисида өз қарашлирини шәрһийиләп өтти.

Һазир иҗтимаий таратқуларда уйғур җамаитиниң канаданиң ушбу қарариға нисбәтән алқиш садалири вә канада парламентиға болған рәһмәт-тәшәккүр баянлири һелиму давам қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт