Kanadadiki ammiwiy teshkilatlar gwillimburi shehri bilen shixenze shehiri otturisidiki "Dostluq" qa naraziliq bildürdi

Muxbirimiz méhriban
2019-11-08
Élxet
Pikir
Share
Print
Kanada sherqiy türkistan jem'iyitining bashchiliqida "Kanada kommunizimgha qarshi teshkilatlar birliki" ge eza teshkilatlarning wekilliri kanadadiki gwillimburi shehri bilen shixenze shehiri otturisida 21 yildin buyan dawamliship kéliwatqan "Dostluq munasiwiti" ge naraziliq bildürgen. 2019-Yili 7-noyabir. Gwillimburi, kanada.
Kanada sherqiy türkistan jem'iyitining bashchiliqida "Kanada kommunizimgha qarshi teshkilatlar birliki" ge eza teshkilatlarning wekilliri kanadadiki gwillimburi shehri bilen shixenze shehiri otturisida 21 yildin buyan dawamliship kéliwatqan "Dostluq munasiwiti" ge naraziliq bildürgen. 2019-Yili 7-noyabir. Gwillimburi, kanada.
Tuyghun Abduweli teminligen.

Kanada sherqiy türkistan jem'iyitining bashchiliqida "Kanada kommunizimgha qarshi teshkilatlar birliki" ge eza teshkilatlarning wekilliri kanadadiki gwillimburi shehri bilen shixenze shehiri otturisida 21 yildin buyan dawamliship kéliwatqan "Dostluq munasiwiti" ge naraziliq bildürgen.

Kanada sherqiy türkistan jem'iyitining bashliqi tuyghun abduweli ependining bildürüshiche, ular bu yil 3-aydin bashlap, kanada sherqiy türkistan jem'iyiti namidin gwillimburi sheher bashliqigha arqa-arqidin ikki xétim naraziliq xéti ewetken. Emma sheherlik hökümet ularning naraziliq xétige jawap qayturmighanliqi üchün bu qétim kanada sherqiy türkistan jem'iyitining bashchiliqida kanadadiki "Kommunizimgha qarshi teshkilatlar birliki" ge eza bolghan qalghan 6 teshkilat wekilliri 7-noyabir küni gwillimburi sheherlik hökümetke bérip, 3-qétimliq naraziliq xétini tapshurghan. Mektubni sheher bashliqi wirjiniye xaksonning yardemchisi tapshurup alghan. 

Gwillimburi sheher bashliqining yardemchisige tapshurup bérilgen naraziliq xéti ikki parche bolup, biri kanada sherqiy türkistan jem'iyitining bashliqi tuyghun abduweli ependining shexsiy namidin sheher bashliqi wirginiye xakson xanimgha yézilghan. Yene bir parche xet "Kanada kommunizimgha qarshi teshkilatlar birliki" namidin kanada sherqiy türkistan jem'iyitining telipini qollash mektubi iken.

Her ikki parche mektubta xitay hökümitining 2015-yilning axiri bashlan'ghan, 2017-yildin kéyin jiddiy élip bérilghan Uyghurlarni lagérlargha qamash herkitide 3 milyon'gha yéqin Uyghur we bashqa yerlik xelqlerning yighiwélish lagirlirigha qamalghanliqi, shixenze shehirining özide 7 orunda bu xildiki lagérlarning mewjutluqi, mushundaq ehwalda kanadaning gwillimburi shehirining shixenze shehri bilen "Dost sheher" munasiwitini dawamlashturushining kishilik hoquqqa xilap qilmish hésablinidighanliqi, buninggha qarita epsusluq we naraziliq bildüridighanliqi bayan qilin'ghan. Mektubta sheher bashliqi wirginiye xaksondin ikki sheher ottursidiki soda munasiwetlerde Uyghurlar mesilisini otturigha qoyushini, eger xitay hökümiti ularning pikirrlirige qulaq salmisa, gwillimburi shehirining shixenze shehiri bilen bolghan dostluq munasiwitini üzüshi lazimliqi chaqiriq qilin'ghan. 

Tuyghun ependi yene kanada sherqiy türkistan jem'iyitige wakaliten öz imzaliqida yézilghan xetning toluq tepsilati heqqide toxtaldi.

7-Noyabir künidiki gwillimburi sheher bashliqigha naraziliq xéti tapshurush pa'aliytige qatnashqan shéng shö xanimmu radiyomiz ziyaritini qobul qildi.

Shéng shö xanimning bildürüshiche, kanada sherqiy türkistan jem'iyitining bashchiliqida "Kanada kommunizimgha qarshi teshkilatlar birliki" ge eza teshkilatlardin "Xitay démokratlar fédératsiyoni", "Bir awaz bir dunya" teshkilati, "Erkin tibet oqughuchilar teshkilati", "Diniy erkinlik teshkilati", "Kanada teywenlikler kishilik hoquq teshkilati", "Shimaliy koriye kishilik hoquq kéngishi" qatarliq 6 teshkilat wekilliri bilikte naraziliq bildürüsh üchün sheher bashliqining ishxanisigha barghan iken.

Shéng shö xanim özlirining kanada sherqiy türkistan jem'iyitige awaz qoshup, gwillimburi sheherlik hökümetke naraziliq bildürüshning sewebi heqqide toxtilip, mundaq dédi: "Bu ishni deslep kanada sherqiy türkistan jem'iyiti bashlighan idi. Biz bügün tunji qétim sheherlik hökümet ishxanisigha kelduq. Bizmu özimizning naraziliq xétimizni élip kelduq. Meyli sheherlik hökümetning inkasi qandaq bolushidin qet'iynezer, biz bu ishqa yol qoyalmaymiz. Kanadaning bir shehirining bügünkidek weziyette 7 orunda lagér qurulghan bir sheher bilen öz-ara dostluq munasiwitini saqlap qélishini qobul qilghili bolmaydu. Eger ular bizning tepimizni qobul qilmisa, u halda biz bu mesilini tartqular arqiliq awamning munazirisige qoyumiz. Elwette, biz yene kanadada saylap chiqilghan bir sheher bashliqining kanada xelqining yürek sözige qulaq sélishini ümid qilimiz. Uning kanada puqralirining meydani we qimmet qarishi nuqtisida turup, bu mesilige jiddiy qarap chiqishi kérek dep qaraymiz."

Ziyaritimiz axirida tuyghun abduweli sheher bashliqi yardemchisining mezkur xetni tapshurup alghandin kéyin ulargha bir hepte ichide jawab béridighanliqi heqqide xet ewetkenlikini bildürdi.

Toluq bet