Пәйзиваттики кәнт кадири: «қамал сәвәблик ‹тәрбийәләш' тин кесәл чиққан аблиз ниязниң һаяти хәтәр астида»

Мухбиримиз шөһрәт һошур
2020-02-18
Елхәт
Пикир
Share
Принт
«Тәрбийәләш» лагеридикиләрниң аилә-тавабиатлири билән көрүштүрүлүватқан көрүнүши.
«Тәрбийәләш» лагеридикиләрниң аилә-тавабиатлири билән көрүштүрүлүватқан көрүнүши.
Social Media

Мәлум болушичә, пәйзиваттики бир лагерда бойниға қорқунчлуқ бир өсмә чиқип қелип, 3 айниң алдида қоюп берилгән аблиз нияз дохтурханиға берип-келип давалиниватқан мәзгилдә «вухән вируси» сәвәблик кочилар қамал қилинип, дохтурханиға беришқа амалсиз қалған вә давалиниши үзүлүп қалған. Нәтиҗидә униң бойнидики өсмә күндин‏-күнгә йоғинап, нәпәс елиш вә һәрикәт қилишиға тосалғу болған. У олтурушлуқ шаптул йезисидики аһалиләрниң дейишичә, униң һаяти нөвәттә еғир хәвп астида турмақтикән.

Инкас қилинишичә, «Вухән вируси» Сәвәблик уйғур районида давам қиливатқан җиддий һаләт, йәни аһалиләрниң өй қамаққа елиниши уйғур җәмийитидә һәр хил қийинчилиқ вә паҗиәләрни кәлтүрүп чиқармақтикән.

Биз бу әһвалниң тоғра яки хаталиқини айдиңлаштуруш үчүн пәйзиваттики алақидар органларға телефон қилдуқ. Хадимлар юқириқи әһваллар һәққидә мәлумат беришни қәтий рәт қилди. Әмма изчил ениқлашлиримиз давамида 3 ай аввал лагердин қоюветилгән вә дохтурханиға берип келип давалиниватқан аблиз ниязниң коча-мәһәлләр қамал қилинған 3 һәптидин буян давалинишиниң үзүлүп қалғанлиқи вә кесилиниң еғирлишип һаяти хәвпкә дуч кәлгәнлики ашкариланди.

Мәлум болушичә, 2017 ‏-йили 10 йиллиқ җаза муддитини әмдила түгәткән аблиз нияз түрмидин қутулуп лагерға тутулған. Сабиқ мәһбуслуқ «гунаһи» билән лагерда икки йерим йилчә ятқан аблиз ниязниң бойнида қорқунчлуқ бир өсмә пәйда болуп қалғанлиқи үчүн лагердин қоюп берилгән. Аблиз нияз пәйзиват наһийәлик дохтурханиға берип келип давалиниватқан мәзгилдә «вухән вируси» сәвәблик кочилар қамал қилинип, өйдин талаға чиқалмиған вә давалиниши үзүлүп қалған. Илгири атушқа қарита елип барған телефон зиярәтлиримиз давамида аһалиләрниң интайин җиддий әһвал астида кәнттин йол хети елип сиртқа чиқалайдиғанлиқи, рухсәтсиз сиртқа чиққан тәқдирдә 15 күнлүк «тәрбийәләш» кә әкитилидиғанлиқи мәлум болған. Аһалиләрниң дейишичә, «тәрбийәләш» тин қорқуп кәткән аблиз нияз дохтурға тәкшүртүш үчүн өйдин сиртқа чиқишқа җүрәт қилалмиған. Кәнт кадирлири аһалиләргә йемәк-ичмәк йәткүзүш алдирашчилиқида кесәл аблиз ниязни дохтурханиға апириш яки йол хети беришкә вақит чиқиралмиған.

Алақидар кәнт кадирниң ашкарилишичә, арилиқта бир нөвәт дохтурға тәкшүртүш пурситини қачуруп қойған вә 15 күнчә дориси үзүлүп қалған аблиз нияз йеқинда бир қисим дориларға еришкән. Әмма кечиккән дорилар униң бойнидики өсминиң күнсери йоғинишиниң алдини алалмиған. Нөвәттә бойнидики қош өсмә күндин-күнгә йоғинап тухумдәк чоңлуққа йәткән һәмдә нәпәс елиш вә һәрикәт қилишини қийинлаштурған.

Пәйзиваттики аблиз ниязниң әһвалидин хәвәрдар кишиләр униң түрмидин чиқип лагерға, лагердин чиқип өй қамаққа қапсалғанлиқиға ечиниш билән бирликтә униң нөвәттә һаятиниң еғир хәвп астида икәнлики вә дохтурханиға вақтида апирилип өсмә оператсийәси қилинмиған тәқдирдә 45 яшлиқ аблиз ниязниң һаятидин айрилип қелиш еһтималлиқини илгири сүрмәктә.

Пикирләр (0)
Share
Толуқ бәт