Kent edliye xadimi: "Kentimizning namini 'qizilbayraq' qa özgerttuq, yéngi namni panus ésip tebrikliduq"

Muxbirimiz shöhret hoshur
2019-08-19
Élxet
Pikir
Share
Print
Xotende xitayche qoyulghan yer nami. 2018-Yili 21-séntebir.
Xotende xitayche qoyulghan yer nami. 2018-Yili 21-séntebir.
AP

Melum bolushiche, qaraqashning yawa yézisidiki qedimiy mehellilerdin bolghan bazarboyi kentining nami "Qizilbayraq" qa, petighil kentining nami "Bext" kentige özgertilgen. Da'iriler bu yil 1 ‏-aydin bashlap özgertken bu yéngi namlarni 3‏-ayda kochilargha panus ésip tebriklesh pa'aliyiti ötküzgen.

Öz kimlikini ashkarilashni xalimighan bir anglighuchimizning inkas qilishiche, nöwette Uyghur rayonida dawam qiliwatqan "Sotsiyalistik yéngi yéza" qurush namidiki Uyghur milliy medeniyitini suslashturush heriket dolqunida zor bir türküm mehellilerning milliy qiyapiti we öy imaretlerning milliy uslubi özgertilipla qalmastin, belki yene bir qisim mehellilerning qedimiy namliri belgilik siyasiy puraqqa ige yéngi namlargha özgertilgen. Ashkarilinishiche, qaraqashning yawa yézisidiki bazarboyi kenti "Qizilbayraq" kentige özgertilgen.

Radiyomizgha kelgen inkasta ilgiri xitaygha qarshi weqe yüz bergen kentler namining özgertiliwatqanliqi eskertilgen. Yawa yézisidiki edliye ponkitining xadimi mezkur kent namining néme üchün "Qizilbayraq" qa özgertilgenliki heqqidiki so'alimizgha jawab bermidi. U "Qalaymiqan so'allargha jawab bermeslik" heqqide yuqiridin mexsus qizilbashliq höjjet chüshkenlikini ashkarilidi.

Melum bolushiche, bazar boyi kentining yene bir nami jümebazar kenti bolup, bu kentte hazirgha qeder qarshiliq heriketliri yüz bergen emes. Emma

Radiyomizning xewer arxipliridin ashkarilinishiche, 2016‏-yili 28‏-dékabir küni yüz bergen qaraqash nahiyelik partkomgha hujum qilish weqesi qaraqash nahiyesining yawa yézisidiki 4 neper gumandar teripidin élip bérilghan. Bu tötidin ikkisi del shu nami "Qizilbayraq" qa özgertilgen bazarboyi, yeni jümebazar kentidin iken. Yéziliq edliye ponkitining xadimi bazarboyi, yeni jümebazar kentining namining "Qizilbayraq" qa özgertilishide mezkur weqe yaki weqe hujumchiliri bilen alaqisi bar-yoqluqi heqqidiki so'alimizgha jawab bérishni keskin pozitsiyede ret qildi.

Éniqlashlirimiz dawamida yawa yézisining petighil kentining naminingmu "Bext" kentige özgertilgenliki ashkarilandi.

Radiyo arxipimizdiki mezkur xewerde qaraqash partkom binasigha hujum qilghan gumandardin birining petighil kentidin ikenliki qeyt qilin'ghan idi. Alaqidar kent kadiri mezkur kent namining özgertilishning mezkur weqe yaki gumandar bilen alaqisi bar-yoqluqidin xewersizlikini éytti. Mezkur xadim "Petighil" dégen namining emeldin qaldurulush sewebini "Belkim bu nam chirayliq bolmighanliqi üchündur" dep izahlidi.

Radiyomizgha kelgen inkasta da'irilerning mehelle namlirini özgertishni bir siyasiy ghelibe süpitide tentene qilghanliqini bayan qilghan idi. Petighil kent kadiri kona namning bu yil 1-ayda emeldin qaldurulghanliqi we 3‏-ayda kochilargha panus ésip, yéngi namni mexsus murasim bilen tebrikligenlikini delillidi.

Féysbuk qatarliq ijtima'iy axbarat wasitiliride pikir bayan qilghan Uyghur közetküchiler yéqinqi 3 yildin buyan yéza-bazarlarda kent sékrétarliriningmu xitaylardin teyinliniwatqanliqi, ularning özliri idare qiliwatqan kentlerning namini teleppuz qilalmaywatqanliqi, shunga nam özgertish élip bériwatqanliq éhtimalliqini otturigha qoysa, yene bezi közetküchiler xitayning nam özgertish arqiliq bir tarixiy izni öchürüwatqanliqini ilgiri sürmekte.

Toluq bet