Kikbokschi abdusemet tewekkül: “Nishanim dunya chémpiyoni bolup, sherqiy türkistanni dunyagha tonutushtur”

9-Ayning 1-küni türkiyening isparta shehirige qarashliq éghirdir belediyesi teripidin “Kespiy kikboks chémpiyonlar kéchisi” namliq kikboks musabiqisi ötküzülgen.

Musabiqige türkiye, ezerbeyjan, türkmenistan, qazaqistan we afghanistan qatarliq döletlerdin kelgen kespiy kikboks mahirliri qatnashqan bolup, Uyghurlargha wakaliten istanbulda yashawatqan Uyghur bokschi abdusemet tewekkül qatnashqan. Musabiqe jeryanida u reqibini yéngip, chémpiyonluq kemirige érishken.

Éghirdir shehirining bashliqi mustafa özer ependi sehnige chiqip, Uyghur bokschi abdusemet tewekkülni alahide tebrikligen we xatire resimge chüshken.

Bu qétimliq musabiqini teshkilligen éghirdir shehirining bashliqi mustafa özer ependige Uyghur doppisi bilen sherqiy türkistanning ay-yultuzluq kök bayriqi teqdim qilin'ghan. Bu heqte éghirdir sheherlik hökümetning resmiy taratqulirida süretlik uchurlar tarqitilghan. Uningda yézilishiche, antaliyede yashawatqan Uyghurlarning “Sherqiy türkistan Uyghur xelqi jem'iyiti” namdiki teshkilatining re'isi zakirjan osmanuf, mezkur teshkilatning idare hey'et ezalirini bashlap antaliyedin éghirdir shehirige bérip musabiqini qollighan. Ular éghirdir sheher bashliqi mustafa özer ependige Uyghur doppisi we sherqiy türkistanning bayriqini hediye qilghan. Musabiqe jeryanida Uyghur doppisini béshidin chiqarmighan sheher bashliqi mustafa özer ependi, “Sherqiy türkistanliq qérindashlirimizning bu yerge kélip arimizda bolushidin intayin xushal bolduq” dégen.

Musabiqe bashlinish aldida échilish sözi qilghan mustafa özer ependi, mundaq dégen: “Éghirdir shehiri bu xil xelq'araliq tenterbiye pa'aliyetliri bilen öz namini tonutidu. Bu tenheriket musabiqisi xelqimizge birlikning küchini hés qilduridu”.

Bu musabiqide reqibini yéngip chémpiyonluq kemerini alghan Uyghur bokschi abdusemet tewekkül mexsus ziyaritimizni qobul qilip, öz tesiratlirini bayan qildi.

Igilinishiche, musabiqe 3 minuttin uda 3 qétim ötküzülgen bolup, abdusemet tewekkül 0 ge qarshi 3 netije bilen reqibini mutleq üstünlükte yenggen.

Ziyaritimiz jeryanida, abdusemet tewekkül özining bu yil 24 yashqa kirgenlikini, 9 yashtin bashlap kikboks saheside chéniqip köp qétim musabiqilerge qatnashqanliqini, 18 yashtin bashlap kespiy musabiqilerge qatniship kéliwatqanliqini, bu qétimqi musabiqige qatnishish üchün bir ay mexsus teyyarliq meshqi élip barghanliqini bildürdi.

Abdusemet tewekkül, özining kikboks türide yétiship chiqip, kelgüside türkiyening döletlik komandisigha tallinish, andin xelq'araliq musabiqilerge qatnishish, axirida dunya chémpiyoni bolush arzusida ikenlikini bildürdi.

U yene kelgüside dunya chémpiyoni bolush bilen bir waqitta, xelq'ara musabiqilerde sherqiy türkistan bayriqini lepilditip Uyghurlarni tonushturush؛ xitayning Uyghurlar üstidin yürgüzüwatqan zulum we basturushlirini dunyagha anglitish meqsiti barliqini tekitlep ötti.

U mundaq dédi: “Méning birinchi meqsitim, Uyghurlar we sherqiy türkistanni bilmigen xelqlerge bildürüsh, wetende yüz bériwatqan xitayning zulumni dunyagha anglitishtur”.

Abdusemet tewekkülning bildürüshiche, u bu yil 6-ayda istanbulning Uyghurlar köp olturaqlashqan sefaköy rayonida “Uyghur chéniqish kulubi” achqan iken. Bu kulubta hazir 12 yashtin 36 yashqiche bolghan ariliqta 20 din artuq Uyghur yash-ösmürler we bir qisim türkler abdusemetning meshqawulluqida meshiq qilmaqta iken.

Biz yene abdusemet tewekkülni yéqindin qollap, musabiqilerde uning bille bolghan dadisi ubul tewekkül ependini ziyaret qilduq. Ubul tewekkül ependi, oghli abdusemetning 9 yashtin bashlap chéniqishni bashlighanliqini, özining deslepte uni bu sahedin tosup bashqa bir kesip bilen shughullinishqa ündigenlikini, biraq oghlining waz kechmestin bu sahede dunya sehnilirige chiqip sherqiy türkistan bayriqini lepilditish arzusini ipade qilghanliqini bildürdi. U shuningdin kéyin oghlini qollap-quwwetlep, her qétimliq musabiqilerde uning qéshida bolup kéliwatqanliqini bildürdi.

Kékbokis musabiqisi, boks tenherket türining bir xili bolup, uningda hem qolini ishlitip mushtlishish hem putini ishqa sélip peshwa étish mahariti birleshtürülidiken.