5-Июл күни германийәдә хитайға қарши намайиш өткүзүлди

Ихтиярий мухбиримиз әкрәм
2018-07-05
Елхәт
Пикир
Share
Принт
5-Июл мюнхендики хитай консулханиси алдида өткүзүлгән намайиштин бир көрүнүш. 2018-Йили 5-июл. Мюнхен, германийә.
5-Июл мюнхендики хитай консулханиси алдида өткүзүлгән намайиштин бир көрүнүш. 2018-Йили 5-июл. Мюнхен, германийә.
RFA/Ekrem

Дуня уйғур қурултийи буниңдин бир ай илгири тор телевизийиси вә иҗтимаий таратқуларда чақириқ елан қилип, пүтүн дунядики уйғурларни 2009-йили 5-июл үрүмчидә йүз бәргән қанлиқ вәқәниң 9 йиллиқини кәң көләмдә хатириләшкә чақирған иди. Мәркизи мюнхен шәһиридә болған «явропа шәрқий түркистан бирлики» му муһаҗирәттики башқа уйғур тәшкилатлириға охшаш д у қ ниң чақириқиға аваз қошуп, бүгүн мюнхен шәһиридики хитай консулханиси алдида намайиш уюштурди.

Техи бундин 3 һәптә илгири д у қ 1988-йилидики алий мәктәп оқуғучилар һәрикитиниң 30 йиллиқини хатириләш мунасивити билән мюнхенда «сәпдашлар учришиши» паалийити тәшкиллигән иди. Бу паалийәт үчүн дуняниң һәр йәрлиридин германийәгә кәлгән уйғурлар хитай консулханиси алдида намайиш өткүзүп, уйғур дияридики миллий зулумларға қарши наразилиқлирини ипадә қилишқан һәмдә «шәрқий түркистанға азадлиқ!» дәп шоарлар товлашқан иди. 

Бүгүнму ай-юлтузлуқ көк байрақларни, түрлүк тәшвиқат лозункилирини көтүрүшкән уйғур җамаити «хитайлар вәтинимиздин чиқип кәтсун! җаза лагерлири әмәлдин қалдурулсун!» дегәндәк шоарларни товлашмақта.

Бу намайиш бу йил киргәндин буян мюнхен шәһиридә өткүзүлгән 4-қетимлиқ намайиш болуп, уйғурлар бундин илгири «5-феврал ғулҗа вәқәси» вә «5-апрел барин вәқәси» ни хатириләш намайишлирини өткүзгән иди. Бундин башқа германийәдики уйғурлар йәнә 27-апрел явропа иттипақи алдида өткүзүлгән «5 миң кишилик намайиш» қа һәмдә берлинда өткүзүлгән намайишларға қатнашқан иди.

Д у қ диний ишлар комитетиниң мудири, «явропа шәрқий түркистан бирлики» ниң рәиси, өз нөвитидә йәнә «шәрқий түркистан өлималар бирлики» ниң әзаси болған турғунҗан алавудун әпәнди намайиш муқәддимисидә нутуқ сөзләп, уйғурларниң «5-июл үрүмчи вәқәси» ни мәңгү унутмайдиғанлиқини тилға алди.

Д у қ ниң явропа вәкили, «явропа шәрқий түркистан бирлики» ниң муавин рәиси әсқәрҗан намайиш җәрянида герман җамаитигә «5-июл вәқәси» вә уни хатириләштики мәқсәтни аңлитип өтти.

Бу қетимқи намайишқа қатнашқан мюнхендики җамаәт әрбаби аблимит турсун әпәндиму зияритимизни қобул қилип «таки азад шәрқий түркистан дөлити дуняға кәлмигүчә күрәшлиримиз давам қилиду,» деди. Д у қ фондиниң мәсули абдуҗелил қариһаҗимму бу қетимқи намайиш һәққидә қарашлирини баян қилип өтти.

Бүгүн чүштин кейин саәт 16:00 дин 17:30 ғичә давамлашқан намайиш җәрянида уйғурчә, германчә, хитайчә шоарлар үзүлмәй товлинип, хитай консулханиси алдини ләрзигә салди.

Пикирләр (0)
Share
Толуқ бәт