Бишкәктә 5-июл қанлиқ вақәси хатириләнди

5-Июл күни бишкәк шәһиридә қирғизистан уйғурлири “иттипақ” җәмийитиниң уюштуруши билән 2009-йили 5-июлда үрүмчи шәһиридә йүз бәргән қанлиқ қирғинчилиқ вәқәсиниң 8 йиллиқини хатириләш йиғини болуп өтти.

Йиғинға бишкәк шәһири вә униң әтрапидики наһийә вә йезилардин қара балта вә тохмақ шәһәрлиридин кәлгән уйғур җамаәтчилики қатнашти. Йиғинға “иттипақ” җәмийитиниң рәиси артиқ һаҗийеф риясәтчилик қилди. У дәсләп җамаәткә салам йоллап, пүтүн уйғурлар яшаватқан дөләтләрдә бүгүнки матәм күн хатирилиниватқанлиқини вә хитай һөкүмитигә наразилиқ билдүрүш паалийәтлири өткүзүлүватқанлиқини билдүрүп, ақсақаллар кеңишидин мирзаким абдулофни вәтән азадлиқи вә мустәқиллиқи йолида қурбан болған шеһитларға атап хәтмә қуран оқушқа тәклип қилди.

“иттипақ” җәмийитиниң муавин рәиси дилшат хасаноф доклат бәрди. Өз доклатида у, хитай даирилири узун йиллардин бери, уйғурларниң инсаний һәқ ‏-һоқуқлирини дәпсәндә қилип келиватқанлиқини, 2009-йили 5-июл үрүмчидә студент вә яшларниң тинчлиқ намайишини хитай һөкүмитиниң қораллиқ әскәр-қисимларни ишқа селип қирғин қилғанлиқини, нәтиҗидә бир нәччә йүз кишиниң қурбан болғанлиқини, нәччә миңлиған яшларниң түрмиләргә соланғанлиқини, 5-июл вәқәсигә қатнашқан нәччә йүзлигән яшларниң өлүм җазасиға, муддәтсиз түрмә җазасиға һөкүм қилинғанлиқини һәмдә хитайниң, хәлқаралиқ инсан һәқлирини һимайә қилиш тәшкилатлириниң, бу хил қирғинчилиқ сияситини тохтитиш тоғрисидики қарарлириға бойсунмай, та бүгүнки күнгичә давамлаштуруватқанлиқини тәнқидләп өтти.

Қошумчә доклат билән инсан һоқуқлирини қоғдаш тәшкилатниң рәиси турсун ислам ниязи сөзгә чиқип, бир вәтәнпәрвәр уйғур сақчиниң әвәткән мәлуматлирини тонуштуруп өтти.

Йиғин қатнашқучиси, “иттипақ” җәмийити аяллар кеңишиниң рәиси рәшидәм әмәтханова өз һессиятлирини сөзләп өтти.

Йиғинниң ахирида, артиқ һаҗийеф 5-июл паҗиәсиниң 8 йиллиқини хатириләш мурасимиға қатнашқан барлиқ вәтәндашларға “иттипақ” җәмийити намидин өз миннәтдарлиқини билдүрди.

Шундақла бу йил биринчи қетим, 5-июл қанлиқ вәқәси қирғизистанниң җәнуби вилайитидә “иттипақ” җәмийитиниң җалалабад шәһиридики шөбиси тәрипидин вә әлишер насирахунофниң қоллап-қуввәтлиши билән уюштурулуп, қирғизистан хәлқ ассамблейәсиниң идарисидә хатириләнди. Хатириләш паалийитигә җалалабад шәһири вә әтраплиридики йезилиридин кәлгән уйғур җамаити вә башқа милләтләр вәкиллири қатнашти.