Abduweli ayupning ürümchi lyudawan türmisige qamalghanliqi melum boldi

Muxbirimiz qutlan
2014.06.18
abduweli-ayup-ana-til-shirket.JPG “Ana til xelq'ara soda cheklik shirkiti” ning mudiriyet ezaliri: (soldin onggha)dilyar obul , ekberjan , abduweli ayup we muhemmetsidiq ependiler. 2013 Yili 28-iyun, ürümchi.
Oqurmen teminligen

Uyghur ana tilliq ma'aripining teshebbuschisi we tonulghan tor yazghuchisi abduweli ayupning ürümchi lyudawan türmiside tutup turuluwatqanliqi melum boldi.

Abduweli ayup we uning ikki sepdishi tutqun qilinip 6 aydin ashqiche da'iriler hem ularning a'ile-tawabi'atlirigha hem tashqi dunyagha bu heqte héchqandaq uchur bermigen idi. Yérim yildin buyan bu délogha köngül bölgüchi her sahediki kishiler bolsun yaki xelq'araliq taratqular bolsun abduweli ayup qatarliq wijdan mehbuslirining qeyerge qamalghanliqi we ularning nöwettiki ehwali heqqide éniq melumat élishqa amalsiz qalghan idi.

Yéqinda abduweli ayupning a'ilisidikiler adwokat arqiliq uning ürümchidiki lyudawan türmisige qamalghanliqidin xewer tapqan, emma uning bilen yenila yüzturane körüshelmigen.

Igilishimizche, abduweli ayupning a'ilisidikiler ürümchi tengritagh rayonluq teptishning bu yil 5-ayning 17-küni sot mehkimisige yollighan eyibnamisidin xewer tapqan. Eyibnamide aldi bilen abuweli ayup qatarliq “Ana til xelq'ara hessidarliq cheklik shirkiti” ning 3 neper xadimining “Qanunsiz meblegh toplash” jinayiti bilen eyiblen'genliki tilgha élin'ghan.

Melum bolushiche, mezkur eyibname abduweli ayup, dilyar obul we muhemmetsidiq ücheylenning namigha yézilghan bolup, buningdin ularning hemmisining lyudawan türmiside ikenliki perez qilinmaqta. Abduweli ayupning a'ilisidikilermu bu texminni ilgiri sürmekte.

Melumki, abduweli ayup tutqun qilinishtin ilgiri Uyghur ana tilliq ma'aripni eslige keltürüsh shundaqla Uyghur bashlan'ghuch ma'aripida inqilab xaraktérlik islahat élip bérish heqqide bir qatar ammiwi léksiye we nutuqlarni sözligen.

U 2013-yilining béshida qeshqerdiki chinibagh méhmanxanisida Uyghur anilirigha sözligen “ Anilargha qerzdar dunya” namliq léksiyeside tunji qétim balilarda barawerlik éngini yétildürüshning zörürlükini tekitligen. U barawerlikning insandiki eng eqelliy tuyghu ikenlikini, balilargha a'ilidin bashlap barawerlik terbiyisi élip barmighanda ularning chong bolghanda barawerlik hoquqini telep qilmaydighanliqini eskertip ötken.

U léksiyeside yene, meyli a'ilide bolsun yaki mektepte bolsun balilarda tewekkülchilik éngi bilen jür'et tuyghusini tikleshning kem bolsa bolmaydighan roh ikenlikini alahide teshebbus qilghan.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.