Ablimit damollamning ölümige qéyin-qistaqning seweb bolghanliqi ilgiri sürülmekte

Muxbirimiz shöhret hoshur
2017-06-16
Élxet
Pikir
Share
Print
Qeshqer türmisi.
Qeshqer türmisi.
www.ts.cn

Muxbirimizning bügünki éniqlishi dawamida, hörmetke sazawer diniy zat ablimit damollamning tutqundiki mezgilide jan üzgenliki delillen'gen bolsimu, ölümining sewebi téxi éniq aydinglashmidi. Merhumning oqughuchiliri xet arqiliq teminligen we muxbirimiz nezerbaghdiki saqchilardin igiligen bezi uchurlar, ablimit damollamning ölümige u yéqinqi aylarda duch kelgen jismaniy yaki rohiy qéyin-qistaqning seweb bolghanliq éhtimalliqi isharetlenmekte.

Biz bügünki éniqlishimizda, aldi bilen ablimit damollamning eng yéqinqi mezgildiki olturushluq orni heqqide melumat soriduq. Östengboyi saqchi xadimi bu heqte melumat bérelmidi, emma ablimit damollamning wapat bolghanliqini delillidi. Qeshqer sheherlik birlik sep idarisi ablimit damollamning wapat bolushtin ilgiri nezerbagh 4-kent toqquztash meschitining xatibi ikenlikini bayan qildi.

Ablimit damollamning sabiq oqughuchiliri yollighan uchurlarda déyilishiche, yéqinqi aylarda ablimit damollam xitayning qizil teshwiqat sépigha qétilishqa mejburlan'ghan. Emma damollam salametlik sewebini bahane qilip, xitayning teshwiqat sépidin özini tartqan. Yene uchurlarda déyilishiche, damollam ikki ayning aldida tutqun qilin'ghan we qamaqxanidiki mezgilde ilgiriki atalmish xata teblighlirige tüzitish bérish, xataliqlirini boynigha élish we towiname bayan qilishqa qistalghan. Uning ölümi del mushu mezgilge duch kelgenliki üchün uning oqughuchiliri damollamning ölümige, u qamaqxanida duch kelgen jismaniy yaki rohiy qéyin qistaqning seweb bolghanliqini ilgiri sürüshmekte. 

Biz merhumning ölüm sewebi heqqide qeshqer sheherlik birliksep idarisidin melumat soriduq. Birliksep xadimi, bu heqte sheherlik partkom teshwiqat idarisining bayanat bérishke hoquqluq ikenlikini éytti. Teshwiqat bölümi xadimi merhumning ölüm xewirini delilligen bolsimu, sewebi heqqide melumat bérelmidi. 

Biz axirida, nöwette türkiyede yashawatqan sabiq saqchi xadimi yolwas ependidin bu ölümning sewebi heqqide texminlirini soriduq. Uning bayan qilishiche, merhumning a'ile qorusining mexsus saqchilar teripidin nazaret astida tutulushi, uning ölümide saqchilarning mes'uliyiti barliqining bir ipadisi. Yolwas ependi, eger qamaqxanida mehbuslar öz ejili bilen ölgen teqdirde, ölüm sewebi a'ilisige ochuq chüshendürülidighanliqi, qorosini nazaretke élishtek bixeterlik tedbirige hajet qalmaydighanliqini bayan qildi. U yene, bezi chaghlarda qachqun gumandarlarni tutush üchün uning a'ilisining nazaret qilinidighanliqi, emma bu nazaretning ammigha ashkara emes, yoshurun élip bérilidighanliqini éytti.

Toluq bet