Америкидики уйғурлар вашингтонда җәм болуп хитай вә тайландқа қарши наразилиқ намайиши өткүзди

Мухбиримиз қутлан
2015-07-13
Share
tayland-uyghur-namayish-washington-1.jpg Америкидики уйғурлар хитай вә тайландқа қарши наразилиқ намайиши қилди. 2015-Йили 12-июл, вашингтон.
RFA/Qutlan

7-Айниң 12-күни, йәни йәкшәнбә чүштин кейин саәт 2:00 дә америкидики уйғур җамаити вашингтонға җәм болуп, хитай вә тайланд һөкүмәтлиригә қарши наразилиқ намайиши өткүзди.

Пайтәхт вашингтон һәмдә униңға қошна вирҗинийә вә марийлан штатлиридин йиғилған нәччә йүзлигән уйғур җамаити алди билән вашингтондики дупунт сиркул бағчисиға йиғилди. Америкидики уйғурларниң хитай вә тайландқа қарши наразилиқ намайишиға һәмдәм болуш үчүн бир қисим қериндаш түрк, әзәрбәйҗан вә қазақ вәкиллириму җәм болди.

Бу қетимлиқ намайишниң күч көрситиш йүрүши башлиниш алдида америкидики әзәрбәйҗан тәшкилатиға вакалитән сабир байрамли әпәнди сөз қилди.

Сабир байрамли әпәнди сөзидә дуняда һазир шималий сипрусни өз ичигә алған 7 мустәқил түркий тиллиқ дөләт мәвҗут болсиму, әмма уларниң уйғурларға нисбәтән һечқанчә саһиб чиқмиғанлиқини тәкитлиди. У йәнә “гәрчә бүгүн түркийә түрк дунясидики йетәкчи дөләт болуш сүпити билән уйғурлар һәққидә гәп қиливатқан болсиму, лекин йәнила йетәрлик әмәс. Әзәрбәйҗан, қазақистан вә башқа түркий җумһурийәтлириниң уйғурлар һәққидики авази техиму йетәрлик әмәс. Түрк дуняси чоқум уйғур мәсилиси бойичә әң авангарт сөзчи вә саһиб болуши керәк” дәп көрсәтти.

Америка уйғур бирләшмисиниң рәиси алим сейтоф намайишниң рәсмий башланғанлиқини, намайишчиларниң тәртиплик вә тинч усулда вашингтондики тайланд әлчиханисиға қарап йүрүш қилидиғанлиқини җакарлиди.

Нәччә йүзлигән намайишчилар қошуни саәт 2 дин 20 минут өткәндә дупунт сиркул бағчисидин қозғилип, һәйвәтлик сәп түзүп тайланд әлчиханисиға қарап йүрүш қилди. Ай юлтузлуқ көк байрақ, америка байриқи вә түркийә байрақлири билән биргә вашингтон кочилирини қаплиди. Намайишчиларниң шоар вә садалири әтрапни ләрзигә кәлтүрди.

Намайишчилар қошуни вашингтонниң кона шәһири болған җорҗи тавин кочисиға йетип кәлгәндә кочидики кишиләр тохтап намайишчиларға һөрмәт билдүрди. Бәзи америкилиқлар намайишчилар сепигә қошулуп биллә шоар товлиди. Бәзилири намайишчиларға әгишип һәмдәм болди. Сақчи аптомобиллири намайишчилар алдида йол ечип маңди.

Намайишчилар қошуни бирқанчә километир йол бесип, ахири җорҗи тавиндики тайланд әлчиханиси алдиға йетип кәлди. Бүгүн йәкшәнбә болғачқа гәрчә әлчихана тақалған болсиму, лекин әтраптики нурғун кишиләр бу йәргә йиғилип намайишни көрди. Америка уйғур бирләшмисиниң муавин рәиси өмәр қанат сөз қилип, бүгүнки намайишниң сәвәби вә мәқсәтлири һәққидә чүшәнчә бәрди.

Тайланд әлчиханиси алдида бир саәттәк наразилиқ билдүрүш намайиши давам қилғандин кейин, намайишчилар йәнә сәп тартип, потомәк дәряси бойидики кочини бойлап дупунт сиркулға қайтип кәлди. Бу қетимлиқ намайишни тәшкиллигән америкидики уйғур путболчи яшлар гурупписиниң вәкиллири уйғурчә вә инглизчә нутуқ сөзләп, өзлириниң җамаәткә вә уларниң коллектип күчигә болған һессиятлирини баян қилди.

Ахирида алим сейтоф хуласә сөзи сөзлиди һәмдә бүгүнки намайишниң ғәлибилик ахирлашқанлиқини билдүрди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт