Aqsu aykölde yene ikki neper Uyghur yash étiwétilgen

Muxbirimiz shöhret hoshur
2014-08-20
Share
qeshqer-saqchi-herbiy-uyghur-qarshiliq.jpg Kocha charlawatqan xitay qoralliq küchliri. 2014-Yili 3-mart, qeshqer.
Imaginechina


Bügün radi'omizgha kelgen bir namsiz xette bayan qilinishiche, yéqinda aqsu aykölde ikki neper Uyghur yash xitay eskerliri teripidin étiwétilgen. Xette yene bayan qilishiche, eskerler étizda ishlewatqan ikki neper yashni so'al - soraqsizla étiwetken. Xette étiwétilgen ikki neper yashtin birining ismining yasin qari ikenliki bayan qilin'ghan. Muxbirimizning bu yip uchigha asasen éniqlashliri dawamida, weqening 16 - awghust yeni shenbe küni aykölning hasa dégen yéride yeni 19 - kenttiki seyshenbe bazarda yüz bergenliki ispatlandi.

Ayköl yéziliq saqchixana xadimliri deslepte weqedin xewersizlikini éytti, arqidin weqedin xewerdar ikenlikini, emma alaqidar uchurlarni ashkariliyalmaydighanliqini éytti.

So'al: étiwétilgen yasin qari dégen balining dadisi qaysi orunda ishleydu?

Jawab: qaysi yasin qari u?

So'al: qaysi küni étiwétilgen balilardin biri. Weqedin xewiringiz yoqmu?

Jawab: bu heqte bashliqlirimizdin melumat éling.

So'al: weqe qaysi kentte yüz berdi?

Jawab: : buni men dep bérelmeymen?

So'al: bilmemsiz yaki dep bérishni xalimamsiz?

Jawab: bilimen, dep bérelmeymen.

So'al: weqe qaysi küni yüz berdi? bilemsiz - bilmemsiz?

Jawab: bilimen, dep bérelmeymen.

Aykölde bir idarining nöwetchi xadimi weqe heqqidiki uchurni jem'iyettin anglighanliqini, emma idare mes'ullirining bu heqte özige melumat bermigenlikini éytti. Uning bayan qilishiche, ötken hepte saqchilar, 20 - kenttiki bir öyge kirip öy igisidin oghlini sürüshte qilghan, öy igisi oghlining öyi ayrim ikenlikini éytqandin kéyin, saqchilar u öyge bésip kirip u öydiki oghulni so'al - sraqsizla étip tashlighan. Bu nöwetchi xadimning bayan qilishiche, weqede étiwétilgenler ikki neper bolup, bulardin biri 19 - kenttin iken.

Biz yene 10 - kenttiki bir mehelle bashliqidinmu ehwal igiliduq. Bu mehelle bashliqi weqe heqqide öz ezaliridin melumat anglighanliqini éytti:

- Shenbe küni seyshenbe bazargha bérip kéliwatqan ezalirimiz, yol üstide étiwétilgen bir balining jesitini körüptu, jesetning üsti yépiqliq iken. Yollar tosuwétiliptu, saqchilar ezalarni bashqa yol bilen méngishqa buyruptu......

Hörmetlik radi'o anglighuchilar, yuqiriqi melumatlardin qarighanda, étiwétilgen ikki yashning biri, 20 - kent؛ yeni birsi 19 - kent ezasi ikenliki؛ birining öyide, yene birining yol boyida yeni étizda étiwétilgenliki éhtimalgha yéqin körülmekte. Emma ularning qandaq bir guman yaki qandaq bir jeryanda étiwétilgenliki hazirche melum emes. Aqsu aykölde ötken yili roza héyt harpisida saqchilar bilen amma arsida toqunush yüz bergen, toqunushta saqchilar az dégende 13 kishini étip öltürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet