Австралийидә "5 - април барин инқилабиниң 23 йиллиқи" ни хатириләш йеғини ичилди

Ихтиярий мухбиримиз абидә
2013-04-05
Share
awstraliye-barin-2013-305.png Йиғин тәшивиқан варақчиси
RFA/Abide

Шәрқий түркистан австралийә җәмийитиниң орунлаштуруши билән 4 - айниң 5 - күни австралийиниң адилайд шәһиридә 5 - април барин инқилабиниң 23 йиллиқи" ни хатириләш вә шеһитләр роһиға атап дуа қилиш сөһбәт йиғилиши өткүзүлди.

Сөһбәт йиғилиши аввал имам абдусалам алимниң шеһитләргә атап қилған қуран тилавити билән башланди. Йиғинда шәрқий түркистан австралийә җәмийитиниң рәиси абдулғупур мөмин әпәнди, шәрқий түркистан җәмийитиниң пәхри рәиси әхмәт игәмбәрди әпәнди вә башқа йиғинға қатнашқучилар сөзгә чиқип барин инқилабиниң арқа көрүнүши, әһмийити вә тәсири һәққидә сөз қилди. Улар өз сөзлиридә бүгүнки күндә дуняниң һәр қайси йәрлиридә яшаватқан шәрқий түркистанлиқ қериндашларниңму бу күнни хатириләватқанлиқини, мушу күнниң ибрәтлирини вә тәсирлирини өз әвладлиримизға йәткүзүватқанлиқини, бизниң бу күнни немә үчүн хатириләйдиғанлиқимизни сөзләп өтти.

Шәрқий түркистан австиралийә җәмийитиниң рәиси абдулғупур мөмин әпәнди бу һәқтә сөзләп мундақ деди:

1990 - Йили 4 - айниң 5 - күни вәтинимизниң җәнубиға җайлашқан ақту наһийисиниң барин йезисида йүз бәргән миллий мустәқиллиқ һәрикитимизниң 23 йиллиқни хатириләш йиғиниға хош кәлдиңлар. Шу барин вәқәси бизниң нурғун шеһитлиримиз, қәһриманлиримиз җанлири вә маллирини, өзниң яшлиқ һаятини беғишлап, уйғур хәлқиниң мустәқиллиқ дәвасини, уйғур хәлқиниң мәңгү тиз пүкмәйдиған бир қәһриман милләт икәнликини, шәрқий түркистанниң хитай коммунистлириға, хитай миллитигә мәнсуп әмәсликини пүтүн дуняға аңлатқан тарихи бир вәқә. Һәмдә бу вәқә шәрқий түркистан хәлқиниң миллий мустәқиллиқ роһини ойғатқан тарихи бир вәқә. Улар ашу инқилабқа кириштин бурун өзлириниң өлүп кетишлирини яки хитай түрмилиридә йитишини биләтти. Билип туруп шу сәпәргә атланди. Немә үчүн? вәтән, милләтниң қайғусини, әнә ашу земниниң мустәқиллиқини, өзиниң әркинликини, һөрлүкини, ғурурини, дәпсәндә болуватқан миллий кимликини, дәпсәндә болуватқан ача - сиңиллиримизниң ғурурини қоғдаш үчүн өзиниң җанлири вә маллири билән шу күрәшкә атланди дунядин пак һалда, хатирҗәм һалда алланиң һузуриға қәһриманларчә кәтти. Бизчу? бизму шу вәтәнсизликиниң дәрдидин, вәтинимизни шу хитай таҗавузчилири бесивалғанлиқи үчүн биз мана мушу вәтинимиздин онмиңларчә узақ мусапә болған австралийидә яшаватимиз.

Шәрқий түркистан австиралийә җәмийитиниң катипи нурмуһәммәт түркистани барин инқилаби шундақла бу инқилабниң уйғур дәвалириға көрсәткән тәсирлири һәққидә тохтилип өтти.

Йиғинға қатнашқучилар өз тәсиратлирини баян қилип бу вәқәниң уйғур миллити үчүн зор бир йоқитиш болсиму, әмма күрәшниң өлмәйдиғанлиқини, барин инқилабиниң шәрқий түркистанлиқларниң қәлбидә мустәқиллиққә болған ишәнчни ашурғанлиқини ийтишти. Бу қетимқи сөһбәт йиғини көпчиликниң шеһитләргә вә шундақла вәтәндә хитай зулуми астида қийниливатқан қериндашлириға дуа қилиш билән ахирлашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт