Уйғурлар вә тибәтләр австралийәниң парламент бинаси алдида хитайға қарши намайиш елип барди

Ихтиярий мухбиримиз һаҗи қутлуқ қадири
2017.03.23
awstraliye-namayish-li-kechyang.jpg Уйғурлар вә тибәтләр австралийәниң парламент бинаси алдида өткүзгән хитайға қарши намайиштин көрүнүш. 2017-Йили 23-март.
RFA/Qutluq

23-Март күни австралийәдә зиярәттә болуватқан хитай баш министири ли кечаңниң австралийә парламентида елип баридиған икки дөләт сөһбити башлиништин илгири, австралийәниң һәр қайси шәһәрлиридә яшаватқан уйғур, тибәт, фалуңгуң муритлири вә хитай өктичилири пайтәхт канбирадики парламент бинаси алдиға җәм болуп, бирликтә хитайға қарши намайиш елип барған. Биз мәзкур намайиш һәққидә толуқ мәлуматқа еришиш үчүн намайиш мәйданиға телефон қилип бу һәқтә учур игилидуқ.

Алди билән телефон зияритимизни қобул қилған австралийә шәрқий түркистан җәмийитиниң рәиси нурмуһәммәт түркистани намайиш һәққидә тохталди.

Намайишқа иштирак қиливатқан австралийә уйғур җәмийитиниң рәиси доктор мәмтимин әла австралийә парламентида хитай баш министири ли кечаң билән австралийә тәрәпниң бүгүн елип баридиған икки тәрәп сөһбитидә асаслиқи немиләрниң оттуриға қоюлидиғанлиқи тоғрисида өзиниң қарашлирини баян қилди.

Доктор мәмтимин әла бу қетимқи икки тәрәп сөһбитидә уйғур, тибәт кишилик һоқуқ мәсилисиниң оттуриға қоюлуши еһтималлиқтин йирақ дәп қаралсиму, бирақ австралийәниң башқа мәсилиләрни оттуриға қоюш арқилиқ хитайға кишилик һоқуқ мәсилисидә бәлгилик дәриҗидә бәзи бесимларни елип келидиғанлиқиниң мумкинчиликини баян қилди.

Униң ейтишичә, өткән йилиниң ахири австралийә һөкүмити уйғур кишилик һоқуқ мәсилилири бойичә австралийәдики уйғур кишилик һоқуқ паалийәтчилири билән бир қетимлиқ сөһбәт елип барған. Лекин, хитай баш министири или кечаңниң австралийә зияритидин илгири һөкүмәт тәрәп уйғур мәсилилири бойичә сөһбәт елип бармиған болсиму, бирақ австралийәдики уйғур кишилик һоқуқ тәшкилатлири австралийәдики уйғур мәсилисини йеқиндин қоллап келиватқан сиясий партийәләрдин “ йешиллар партийәси” вә шундақла бир қисим һөкүмәт әмәлдарлири билән көрүшүп уйғур мәсилиси тоғрисида бәзибир мәсилиләрни аңлатқан.

Зияритимиз җәрянида йәнә, намайишқа сйдений шәһиридин келип қатнишиватқан уйғур зиялийлиридин җүрәт әпәнди бүгүнки намайиш һәққидики өз тәсиратини баян қилди.

Австралийәдики уйғур сиясий актип султан әпәнди, хитай баш министири ли кечаң парламент бинасиға қәдәм ташлиши билән тәң, намайишниң техиму күчәйгәнлики һәққидә учур бәрди.

Игилишимизчә, парламент бинаси алдида хитайға қарши елип берилған уйғур, тибәт, фалуңгуң муритлири вә хитай өктичилириниң бирләшмә намайиш әтигән саәт ондин он иккигә қәдәр икки саәт давам қилған болуп, намайиш мәйданида йәнә, хитай баш министири ли кечаңни қарши елиш үчүн хитай әлчиханиси тәрипидин тәшкилләнгән хитай муһаҗирлири вә оқуғучилириму қоллирида хитай байриқини көтүрүп қарши елиш шоарлирини товлиған.

Юқириқи аваз улинишидин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.