B d t da xitay hükümitidin balilar heqliri toghrisida so'al soraldi

Birleshken döletler teshkilatining 24 - nöwetlik insan heqliri omumiyighinining eng axirqi künliri yeni 26 - , 27 - sintebir künliri mexsus yighin chaqirilip xitay hükümitige wakaliten béyjingdin kelgen 42 wekildin balilar heq - hoquqliri toghrisida so'al soralghan.

D u q re'isi rabiye qadir xanimning éytishiche, xitay wekillerdin Uyghur baliliri toghrisida 11 so'al soralghan bolup, xitay wekiller tüzük jawab bérelmigen.

Yighin'gha 24 - nöwetlik insan heqliri omumiyighinigha b d t balilar heq - hoquqliri komitéti mes'ulliri we ezaliri, her qaysi döletning wekilliri, xelq'ara ammiwi teshkilatlarning mes'ulliri, her qaysi döletlerning b d t da turushluq elchiliri we xitay wekillerdin bolup 200 etrapida kishi qatnashti. Yighinda nuqtiliq halda xitaydiki balilarning heq - hoquqliri depsendichiliki toghrisida xitay wekillerdin so'al soraldi.

Rabiye qadir xanimning éytishiche, mu'awin re'is séyit tümtürk, ömer qanat, mayik we dolqun eysa qatarliq kishilerdin terkip tapqan hey'etning 14 - sintebir künidin 27 - sintebir künigiche élip barghan pa'aliyiti ghelibilik axirlashqan bolup, ular b d t diki pütün komitétlargha pakitliq doklatlarni sun'ghan. Bu pakitlarning köpi erkin asya radi'osidin élin'ghan pakitlar bolup, kishilerni ishendürüsh küchi intayin küchlük iken. Rabiye qadir xanim bergen melumatqa asaslan'ghanda, xitay hökümiti d u q hey'itini b d t din qoghlap chiqirish üchün köp tirishqan bolsimu, d u q hey'iti pütün pa'aliyetlirini muweppeqiyetlik élip barghan.

D u q wekillirining jenwediki ikki heptilik pa'aliyiti kéler ay b d t de ötküzilidighan xitayni insan heqliri jehettin umumiyüzlük tekshürüsh pa'aliyitige teyyarliq körüsh üchün élip bérilghan bolup, bu pa'aliyet jeryanida nurghun döletlerning qollap quwetlishige érishken.