Сабиқ карханичи бухәлчәм русул 6 йил җәң қилип, дәсләпки ғәлибигә еришти

Мухбиримиз шөһрәт һошур
2013.04.05
buxelchem-rusul-305.jpg Ақсудики бир кәспий техника мәктипиниң қурғучиси вә сабиқ карханичи бухәлчәм русул. 2012-Йили январ, бейҗиң.
RFA/Shohret Hoshur

Әрз қилиш дегән бу сөз әсли луғәт мәнисидин қариғанда, қәғәз-қәләм вә сөз биләнла давам қилидиған, һөкүмәт ишханиси яки сот мәйданида хуласилинидиған һәқ тәләп қилиш арзусидики бир қануний һәрикәтни көрситиду. Әмма бүгүн уйғур җәмийитидики реаллиққа қаралғанда, әрз қилиш дегән бу сөз, әмәлдарлар билән қаршилишиш, сақчилар билән елишиш, пойиздин сәкрәп қечиш, меһманханидин тутуп кетилиш вә қамақханиға солап қоюлуш қатарлиқ бир қатар хәтәрлик вә мушәққәтлик җәрянлар билән давам қилидиған бир қәпәс җәңни есимизгә салиду.

Мана бу җәңниң нәтиҗисидә бүгүн уйғур райониниң һәрқайси җайлирида қамақ вә түрмиләрдә йетиватқанлар болғинидәк, бир йүрүш иссиқ өйгә, йеңи аптомобилға вә йүз миң сомлап нәқ пулға еришкәнләрму бар. Радиомиз тәрипидин өткән бир йилда 6 қетим зиярәт қилинған вә хәлқара мәтбуатлардиму иш-изи тилға елинған, ақсу шәһиридики сабиқ карханичи бухәлчәм русул әнә шу җәңдә дәсләпки нәтиҗигә еришкәнләрдин бири. Униң бу нөвәт еришкини 200 миң сом нәқ пул вә бир йүрүш өй.

Бухәлчәм русул, 1996-йили ақсуда кәспий техника мәктипи ачқан; униң ишлири гүллинип, оқуғучиси 200 дин ашқанда, йәни 2000-йили һөкүмәт мәзкур мәктәпниң орнида саяһәт орни бәрпа қилинидиғанлиқини уқтуруп мәктәпни чеқивәткән. Әмма мәктәпни чаққанлиқи үчүн, бухәлчәмгә һечқандақ төләм бәрмигән. Бухәлчәм 2006-йилиға қәдәр 6 йил һөкүмәтниң мәсилини өзлүкидин һәл қилип беришини күткән; әмма һөкүмәт тәрәптин һечқандақ сада чиқмиғандин кейин, 2006-йили әрз қилишқа башлиған.

Бухәлчәм, бу алтә йил җәрянида наһийә, вилайәт, аптоном район вә бейҗиңдики алақидар орунларға көп қетим сәпәр қилған. Бу җәрянда 2 қетим бейҗиңдин тутуп кетилгән, бир қетим нерва кесәлликләр санаторийисигә қамап қоюлған; 3 қетим сақчиханиға қамап қоюлған. Бухәлчәм ахирқи чарә сүпитидә радиомиз зияритини 6 қетим қобул қилип, бешиға кәлгәнләрни дуняға ашкарилиған.

Ақсудики даириләр бултур 8-айда униң билән җиддий һалда сөзлишип, мәсилисини қисмән һәл қилған. Йәни мәктәпниң чеқилған тамлири үчүн төләмни кейингә қалдурған. Мәктәпниң синип, ятақ вә ишханилири үчүн 200 миң йүән нәқ пул вә бир йүрүш олтурақ өй бәргән.

Мәлум болушичә, әрз қилиштин ибарәт бу мушәққәтлик җәңдә йеңип чиққанлардин бери ақсу онсулуқ абдуреһим молләк ака; у өткән йили тартивелинған терилғу йәрлири үчүн 60 мо йәр билән бирликтә 400 миң йүән нәқ пулға еришкән. Шихәнзә кона базарлиқ ғази һамут болса, хитайлар өлтүрүвәткән оғли үчүн 70 миң йүән хун һәққи алған. Бу җәңдә зиянкәшликкә учриғучилардин кәшпиятчи өмәрҗан имин болуп, толуқсиз мәлуматлардин қариғанда, у 2 йиллиқ кесилгән. Ақсу үчтурпанлиқ нурунгул тохти һелиһәм қамақта. Қәшқәр пәйзаватлиқ айгүл тохтиниң ақивити һазирғичә мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.