“12-Dékabir studéntlar herikiti” Uyghur jem'iyitige némilerni hés qildurdi?

1985-Yilidiki “12-Dékabir studéntlar herikiti” Uyghur bügünki zaman tarixidiki dewr bölgüch weqe hésablinidu.

1980-Yillarning bashlirida Uyghur jem'iyitide qayta oyghinishqa bashlighan milliy roh Uyghur studéntlirining ashu qétimliq keng kölemlik namayishi arqiliq idiyidin resmiy heriketke ötkenlikini jakarlighan.

“12-Dékabir herikiti” Uyghur studéntlirining keng kölemlik namayishi arqiliq erkinlik, démokratiye we heqiqiy menidiki milliy barawerlik teleplirini ochuq-ashkara otturigha chiqarghan. Uyghur jem'iyitide milliy hoquq we milletning teqdiri heqqide qayta oylinish dolqunini qozghighan. Bu heriket öz nöwitide yene pütkül xitaydiki démokratik heriketler we oqughuchilar namayishlirining bashlanmisi bolup qalghan.

Bügün biz “12-Dékabir Uyghur studéntlar herikiti” ning 28 yilliq xatirisige béghishlap eyni waqitta bu heriketke qatnashqan bir qisim shahitlar bilen söhbet élip barduq.

Dunya Uyghur qurultiyining bash katipi nurmuhemmet musabay ziyaritimizni qobul qilip, 1985-yilidiki “12-Dékabir studéntlar herikiti” heqqide pikir bayan qildi. U buningdin 28 yil burun Uyghur oqughuchilar otturigha qoyghan erkinlik we démokratiye teleplirining bügünki künde dunya Uyghur qurultiyi tekitlewatqan Uyghur milliy herikitining yönilishi we dunyawi omumiy éqim bilen birdeklikke ige ikenlikini ilgiri sürdi.

1985-Yilidiki “12-Dékabir studéntlar herikiti” ning aktip qatnashchiliridin bolghan roshen abbasmu ziyaritimizni qobul qilip, özining eyni waqittiki kechürmishlirini eslep ötti. U bu namayishning Uyghur bügünki zaman tarixida özige xas orun tutidighan muhim bir ammiwi heriket ikenlikini alahide tekitlidi.

“12-Dékabir studéntlar herikiti” ning yene bir muhim qatnashchisi muhemmet toxti pikir bayan qilip, bu heriketning weten ichi we sirtidiki Uyghur milliy dewasigha körsetken tesirlirini yene bir qétim mu'eyyenleshtürdi.

Axirida Uyghur ziyaliyliridin eziz eysa ependimu ziyaritimizni qobul qilip “12-Dékabir studéntlar herikiti” ning öz qelbidiki milliy tuyghuni urghutqan we küchlendürgen heriket bolghanliqini bayan qildi.

Tepsilatini awaz ulinishtin anglighaysiz.