D u q re'isi rabiye qadir ispaniye kataloniye ölkilik hökümetning rehberlirige Uyghur mesilisini anglatti

Ixtiyariy muxbirimiz erkin tarim
2016.09.29
kataloniye-hokumet-rehberliri-rabiye.jpg D u q re'isi rabiye qadir xanim ispaniyening barsélona shehiride kataloniye tashqi ishlar ministiri ra'ul roméwa bilen. 2016-Yili 28-séntebir, ispaniye.
RFA/Erkin Tarim

Dunya Uyghur qurultiyi re'isi rabiye qadir xanim bilen mu'awin re'is ömer qanat ependi 28-séntebir küni ispaniyening barsélona shehiride kataloniye hökümitining rehberliri bilen uchrishish élip bérip, Uyghurlarning hazirqi weziyiti, Uyghur musapirlar mesilisi toghrisida melumat bergen. Bu uchrishish ölkilik hökümetning mu'awin re'isi bilen tashqi ishlar ministirining biwasite riyasetchilikide ötküzülgen. Mezkur uchrishishta rabiye qadir xanim ispaniyening kataloniye ölkilik hökümitige, Uyghur musapirlarni qobul qilishi toghrisidiki teleplirini otturigha qoyghan. U, arqidin kataloniyede pa'aliyet élip bériwatqan insan heqliri teshkilatlirining mes'ulliridin terkib tapqan 100 etrapida kishige, Uyghur mesilisi toghrisida doklat bergendin kéyin, ularning so'allirigha jawab bergen. Bu pa'aliyetke qatnishiwatqan latin amérikisi, iraq, süriye we pelestin qatarliq döletlerdin kelgen insan hoquqliri pa'aliyetchilirimu d u q re'isi rabiye qadir xanimning doklatini anglighan.

D u q re'isi rabiye qadir xanim we mu'awin re'is ömer qanat qatnishiwatqan “Kishilik hoquqni qoghdaydighan sheherler” mawzuluq pa'aliyetni ispaniyening kataloniye ölkisidiki 14 sheher we kishilik hoquqini qoghdash teshkilatliri uyushturghan. Bu 4-qétimliq yighin bolup, Uyghur wekiller tunji qétim teklip qilin'ghan.

Dunya Uyghur qurultiyi re'isi rabiye qadir xanim radi'omizgha bergen bayanatida, ispaniyening yawropada Uyghurlar we Uyghur ammiwi teshkilatliri yoq bir dölet ikenlikini, bu pa'aliyetning ispaniyede Uyghur mesilisini anglitish üchün zor ehmiyetke ige ikenlikini tekitlidi.

“Kishilik hoquqni qoghdaydighan sheherler” pa'aliyiti ispaniyening kataloniye ölkisidiki 14 sheherde ötküzülidighan bolup, 14 sheherde Uyghur mesilisi anglitilidiken.

Yuqiridiki awaz ulinishidin, dunya Uyghur qurultiyi re'isi rabiye qadir xanimning ispaniyede turup bergen melumatining tepsilatini anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.