Insan heqliri küni munasiwiti bilen myunxénda namayish élip bérildi

Ixtiyariy muxbirimiz ekrem
2013-12-10
Élxet
Pikir
Share
Print
Kishilik hoquq küni munasiwiti bilen xitay konsulxanisining aldida élip bérilghan namayishtin körünüsh. 2013-Yili 10-dékabir, gérmaniye.
Kishilik hoquq küni munasiwiti bilen xitay konsulxanisining aldida élip bérilghan namayishtin körünüsh. 2013-Yili 10-dékabir, gérmaniye.
RFA/Ekrem

Gérmaniyediki Uyghurlar xelq'ara insan heqliri küni munasiwiti bilen 10-dékabir küni myunxén shehiridiki xitay konsulxanisi aldida ikki sa'et namayish élip bardi.

Gérmaniyediki bu namayishni bash shtabi myunxén shehiride bolghan yawropa sherqiy türkistan birliki teshkilati uyushturghan bolup, her yilqigha oxshash bu qétimqi namayishqimu köp sanda Uyghurlar qatnashqanidi. Namayishchilarning qolliridiki ayyultuzluq kök bayraqtin sirt, Uyghurlarning insaniy heq-hoquqliri telep qilin'ghan wiwiska we lozunkilar alahide diqqetni chéketti.

Xitay konsulxanisining aldini, namayishchilarning Uyghurche, gérmanche, xitayche tillarda towlighan "Yoqalsun xitay mustemlikichiliri! yoqalsun shi jinping! xitaylar wetinimizdin chiqip ketsun! bizge musteqilliq kérek!.. " dégendek sho'arliri bir alghan bolup, etraptiki amma qiziqish bilen közetmekte idi. Yawropa sherqiy türkistan birliki teshkilatining re'isi, d u q ning yawropa parlaméntidiki wekili enwerjan ependi neq meydanda ziyaritimizni qobul qilghanda, xelq'ara insan heqliri künini xatirilesh namayishini bashqa ellerdiki Uyghurlargha oxshashla myunxén shehiridiki Uyghurlarningmu her yili ötküzüp kéliwatqanliqini, taki sherqiy türkistan azadliqqa érishkiche bu xildiki naraziliq we qarshiliq heriketlirining toxtimaydighanliqini tilgha aldi.

Namayishqa yawropa sherqiy türkistan birliki teshkilatining ezaliri we myunxén shehiridiki hersahe Uyghurlardin bashqa, d u q ning myunxéndiki rehberliri hemde gérmaniye Uyghur ayallar komitéti xadimlirimu qatnashqan bolup, qurultay medeniyet-ma'arip komitétining mes'uli ablimit tursun ependimu bu namayish heqqide toxtilip ötti. Dunyada xelq'ara insan heqliri küni xatiriliniwatqan mushundaq bir peytte, Uyghur diyaridiki her millet xelqining xitay mustebitlirining shepqetsiz zulumliri astida xarliniwatqanliqini esletken ablimit tursun ependi, Uyghurlarning bu zulumlardin qutulush yolining peqetla ténimsiz küresh qilish ikenlikini tekitlidi.

Bügünki namayish chüshtin kéyin sa'et ikkidin tötke qeder dawam qildi. Namayish jeryanida xitay zulumi we Uyghurlarning tartiwatqan derd-elemliri bayan qilin'ghan teshwiqat wereqchiliri etraptiki ammigha köplep tarqitildi. Xitay konsulxanisi bolsa gérmanlar topliship olturaqlashqan ahaliler rayonigha yerleshken bolup, bezi gérmanlarning bildürüshiche, etraptiki köpligen yerlik xelq bu yerde her yili qanche qétimlap élip bérilidighan namayishlar sewebidin Uyghurlarni yaxshi chüshinipla qalmay, xitayningmu mahiyitini yaxshi tonup yetken.

Toluq bet