Béyjingdin kelgen da'iriler, ghayiplar mesilisining merkizi hökümet bilen alaqisi yoqluqini éytti

Muxbirimiz shöhret hoshur
2014-04-02
Élxet
Pikir
Share
Print
5-Iyul weqesidin kiyin ghayib bolghan kishiler (sol terep yuqiridin sa'et istirilikisining yönilishi boyiche): memet'abla abduréhim, zakir memet, muxter mexet, tursunjan toxti
5-Iyul weqesidin kiyin ghayib bolghan kishiler (sol terep yuqiridin sa'et istirilikisining yönilishi boyiche): memet'abla abduréhim, zakir memet, muxter mexet, tursunjan toxti
Photo: RFA

Melum bolushiche, xitay merkizi hökümiti Uyghur rayonidiki  bir qisim jiddiy mesililerni bir terep qilish üchün aldinqi ayda ürümchige mexsus bir xizmet guruppisi ewetken.

Xizmet guruppisi yer dawasi qatarliq herqaysi sahelerdiki mesililer üstide sunulghan erzlerni qobul qilghan we erzdarlar bilen körüshken؛ emma, 5 ‏-iyuldin kéyin iz-déreksiz ghayip ketkenlerning a'ile tawabati bilen körüshüshni ret qilghan. Xadimlar, ghayiplar mesilisining merkizi hökümet bilen alaqisi yoqluqini éytqan. Emma, aptonom rayondiki alaqidar organlar  buningdin ilgiri ghayiplar heqqidiki tekshürüshning tamamlan'ghanliqini, netijini élan qilish üchün peqet yuqiridin buyruq kütüp turuwatqanliqini éytqan idi.

Muxbir: anglisaq, yéqinda béyjingdin kelgen bashliqlar bilen körüshkini béripsiler, toghrimu?

Patigül: shundaq, yen'en binggu'en dégen méhmanxanigha bir xizmet guruppisi kelgen iken barduq, 5 a'ile.

Muxbir: qobul qilmidi dep angliduq, rastmu?

Patigül: shundaq boldi. Derwazidin tosuwélip kirgili qoymidi. Bu merkezning ishi emes, dep unimidi. Biz emise nening ishi dep soriduq. Ular saqchi orunlirining ishi dédi, biz shu saqchi orunlirigha 5 yildin buyan bérip kéliwatimiz, barsaq yuqiri jawab béridu, yuqiridin jawab kütüwatimiz dep keldi, yuqiri dégen zadi ne dep soriduq, ular jawab bermidi.

Muxbir: silerdin bashqilarni qiliptimu? xewiringlar boldimu?

Patigül: bir tonushum bar idi, yer dawasi qiliwatqan, shular ikkidin-ikkidin kiriptiken, körüshüptiken, shuni anglap barghan iduq.

Muxbir: qandaq qildinglar andin?

Patigül: ketmey turuwalduq, angghiche puqrache kiyin'gen 40-50 saqchi yighildi, öz ‏- ara pichirliship kélip, qolungalarda erz xétinglar barmu dep soridi, bar dések, béringlar biz yetküzüp qoyimiz dédi, biz uninggha unimiduq, shu béyjingdin kelgenlerning özi bilen körüshümiz dep turiwalduq. Ular bashliqlar méhmanxanida yoq, töwen'ge chüshüp ketti, biz yetküzimiz dédi, biz bundaq qeghezni besh yildin buyan bérip kéliwatimiz déduq. Bir chaghda ichide bir xenzu saqchi bar iken, Uyghurchini bizdekla sözleydiken. Men sizni tonuymen dédi, qandaq tonuysen désem, 2010 ‏-yili bir qétim kélip bizni tillap ketkentingiz dédi. Menmu dédim: sen bir tillighinimni untumapsen, men 25 yashqa kirgen balamni menggü untumaymen dédim. Axiri körüshelmey qayttuq, yene aldanduq.

Hörmetlik radi'o anglighuchilar, yuqirida xitay merkizi hökümitidin, ürümchige erz qobul qilghili kelgen xadimlarning 5 ‏-iyuldin kéyin iz-déreksiz ghayip bolghanlar a'ile-tawabi'ati bilen körüshüshni ret qilghanliqi heqqide tepsiliy xewer berduq.

Toluq bet