Мюнхендики хитай консулханиси алдида намайиш елип берилди

Ихтиярий мухбиримиз әкрәм
2014-02-06
Елхәт
Пикир
Share
Принт

5-Феврал күни германийәдики уйғурлар мюнхен шәһиридики хитай консулханиси алдиға топлинип, ғулҗа вәқәсиниң 17 йиллиқини хатириләш һәмдә илһам тохти вә абдувәли аюп қатарлиқ сиясий тутқунларға әркинлик тәләп қилиш йүзисидин намайиш елип барди.

Намайишқа көп санда уйғур қатнашти. Д у қ иҗраийә комитети рәиси долқун әйса әпәнди зияритимизни қобул қилип, ғулҗа вәқәсиниң 17 йиллиқини хатириләш намайишиниң дуняниң һәр қайси җайлиридики уйғурлар топлишип олтурақлашқан дөләтләрниң һәммисидила елип бериливатқанлиқини әскәртти.

Явропа шәрқий түркистан бирлики тәшкилати рәиси әнвәрҗан әпәнди бу қетимқи намайишта диққәтни тартқан бәзи мәсилиләрни тилға елип, уйғурларниң чәтәлләрдә елип бериватқан сиясий көрәшлириниңму бәлгилик үнүмләр һасил қиливатқанлиқини тәкитлиди.

5-Феврал күни чүштин кейин саәт 13.30 Башланған бу намайишқа қатнашқан уйғурлар ғулҗа вәқәсигә мунасивәтлик һәрхил лозунка вә шоарларни көтүрүш билән биргә, йеқинда қолға елинған абдувәли аюп һәм илһам тохтиларниң сүрәтлири чүшүрүлгән лозункиларниму көтүрүшкән иди. Шоар садалири консулхана алдини ләрзигә салатти.

Д у қ мәдәнийәт-маарип комитети мәсули аблимит турсун әпәнди болса, ғулҗа вәқәси вә мушуниңға охшайдиған вәқәләрни хатириләш паалийәтлириниң шәрқий түркистан азад болғанға қәдәр тохтимайдиғанлиқини тилға алди.

Пикирләр (0)
Share
Толуқ бәт