Shiwétsiyediki Uyghurlar “5-Féwral ghulja weqesi” ning 20 yilliqini xatirilidi

Shiwétsiyede pa'aliyet qiliwatqan shiwétsiyediki Uyghurlar “5-Féwral” ghulja weqesi”ning yigirme yilliqini xatirilidi.

1997-Yilidiki ghulja weqesini dunyaning her qaysi jaylirida yashawatqan Uyghurlar yigirme yildin béri herxil türde üzlüksiz xatirilep kelmekte.

Shiwétsiyede yashawatqan Uyghurlarmu 2017-yili 5-féwral yekshenbe küni shiwétsiye Uyghur ma'arip uyushmisining pa'al hemkarlishishi astida teklimakan islam medeniyet merkizining merkizige yighilip ghulja weqesining 20yilliqini xatirilep, shu qétimliq weqede hayatidin ayrilghan Uyghur yashlirining rohigha atap qur'an oqup du'a qilindi.

Pa'aliyet 5-féwral yekshenbe küni shiwétsiye waqti chüshtin sa'et 14:30 de, sotuq bughraxan meschitining imami ömer mexsumning qur'an tilawet qilishi bilen bashlinip 16:00 de axirlashti.

Pa'aliyetke riyasetchilik qilghan Uyghur ma'arip uyushmisining mes'uli abdulla kökyar, bu qétimliq pa'aliyetning meqsiti heqqide toxtilip, 1997-yili 5-féwral küni öz insani hoquqliri we dini étiqad erkinliklirini qoghdash üchün naraziliq namayishi ötküzüp, shuningdek bashqa ene shundaq xil heriketlerde hayatidin ayrilghan, türmilerge solan'ghan we azab chekkenlerni xatirileydighanliqini bildürdi.

Andin sözge chiqqan sotuq bughraxan meschitining mes'uli feruq sadiq ependi 1997-yili 5-féwral küni ghuljada yüz bergen qirghinchiliqtin xewer tapqandin kéyin, shiwétsiyede yashawatqan Uyghur, qazaqlar bilen birlikte 7-féwral küni sitokholmdiki xitay elchixanisi aldigha topliship namayish qilghanliqini, shuningdin béri her yéli bu künde oxshimighan shekilde pa'aliyet uyushturup ghulja qirghinchiliqini xatirilep kéliwatqanliqini anglatti.

Ziyaritimizni qobul qilghan pa'aliyetke qatnashquchilardin abbas ependim bu xildiki xatirilesh pa'aliyitining ösmürlerge bolghan ehmiyiti heqqide toxtaldi.

Teklimakan islam medeniyet merkizining re'isi ömer mexsum ziyaritimizni qobul qilip, ghulja qirghinchiliqida shéhit bolghanlarni rohigha atap du'a qilish we eslep turushning dini we kishilik exlaqi teleplerge uyghun ikenlikini tekitlidi.
Shiwétsiyede pa'aliyet qiliwatqan teshkilatlardin shiwétsiye Uyghur komitétimu komitétning fashta rayonidiki merkizide idare hey'etler we bir qisim ezalarning qatnishishida ghulja weqesining 20 yilliqini xatirilidi, pa'aliyette bezi shahitlar weqe jeryanini eslidi.

Biz Uyghur komitétning ijra'iye komitétining re'isi qurbanjan téléfon ziyaritimizni qobul qilip, pa'aliyet ehwalini tepsiliy anglatti we öz köz qarashlirini otturigha qoydi.