Yopurgha saqchisi: "Gülnar emetni 11 aydin buyan terbiyilewatimiz, mudditi achisi türkiyedin qaytip kelgüche"

Muxbirimiz shöhret hoshur
2017-07-28
Share
yeken-tutush-buyruqi.png Yeken saqchi idarisining 127 Uyghurni tutush tizimliki
RFA/Qutlan

Muxbirimiz bügün yopurgha nahiyisidiki saqchi xadimlirigha qarita téléfon ziyariti dawamida, nahiyilik terbiyilesh merkizide 11 aydin béri tutup turuluwatqan 19 yashliq tutqun gülnar emetning türkiyediki achisi dilber emet seweblik tutulghanliqi ashkarilandi. Melum bolushiche, gülnar emet ikki yil burun türkiyege chiqip ketken achisi dilber emet bilen téléfonda 3 qétim sözleshkenliki üchün, béshigha qara xalta keydürülüp we koyza sélinip tutup kétilgen. Saqchilar gülnarni tutqan küni dadisi emet kichikke , gülnarning achisi türkiyedin qaytip kelgen'ge qeder tutup turulidighanliqini bayan qilghan.

Hörmetlik radi'o anglighuchilar, muhajirettiki Uyghur pa'aliyetchilirining a'ile-tawabi'atlirining tutqun qilinish ehwali birqanche yildin béri yüz bermekte. Emma, da'iriler tutush sewebining tutqunning chet'eldiki tughqini bilen alaqisi barliqini inkar qilip kelgen. Muhajirettiki Uyghur teshkilatliri bolsa xitayning bu qilmishini görüge élish banditliqi dep eyiblep kelmekte . Töwendiki uchurlardin melum bolushiche, yopurghining siyek yézisidiki saqchilar, türkiyede yashawatqan muhajir dilber emetni qayturup ekilish üchün singlisi gülnar emetni tutqun qilghan.  Gülnar emetni béshigha qara xalta keydürüp élip mangghan saqchilar, uning dadisigha, gülnarning türkiyediki achisini qaytip kélish heqqide nesihet qilishqa buyrughan we undaq qilmaydiken, a'ile boyiche qamilidighanliqini uqturghan. 

Yéqinqi aylardin béri ashkarilan'ghan uchurlardin melum bolushiche, xitay da'irilirining bu xil görüge élish jazasi, yalghuz siyasiy pa'aliyetchilerning a'ile-tawabi'atliri bilenla cheklenmigen؛ chet'elde oquwatqan oqughuchilar, hetta héchqandaq teshkiliy pa'aliyetlerge arilashmighan, peqet tirikchilik koyida heriket qilip yürgen muhajirlarning a'ile-tawabatimu bu jazaning sirtida qalmighan. Melum bolushiche dilber emet, toy qilmaqchi bolghan yigiti bilen jem bolush üchünla türkiyege kelgen.

Biz dilber we yigitining türkiyede néme ishlar bilen meshghulluqini sürüshte qilduq. Éniqlashlirimizdin ularning türkiyediki Uyghur jama'iti arisida aktip yaki közge chéliqqan kishilerdin emesliki melum. Emma yopurgha saqchiliri ularning sherqi türkistan teshkilatliri bilen hemkarliq ichide ikenliki perizide.

Melum bolushiche, gülnar emet, ikki yil burun türkiyege chiqip ketken achisi bilen 3 qétim téléfonda körüshken, téléfonda siyasiy mezmun yaki xitay dölet mexpiyetlikige a'it sözlermu bolmighan. Shundaqtimu, gülnar emet bir ay qamaqta yatqandin kéyin, yopurgha nahiyilik terbiyilesh merkizige yötkelgen. 11 Aydin béri atalmish siyasiy qanun terbiyisi éliwatqan gülnar emet, téxiche qoyup bérilmigen.

Yopurghidiki da'iriler gülnar emetni tutup turushta yenila uning achisining qaytip kélishini kütüwatamdu yaki rayonda dawam qiliwatqan üch xil küchlerge qattiq zerbe bérish dolqunining axirlishishini kütüwatamdu? bu, hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.