Гүзәлнур ханим өзигә қаритилған назарәт вә чәклиминиң күчәйтилгәнликини билдүрди

Америка президенти барак обаманиң ханими мишал обаманиң хитай зиярити мәзгилидә бейҗиңдики кишилик һоқуқ актиплири вә әрздарлар тәқип астиға елинған.

15 - январ тутқун қилинған уйғур өктичиси илһам тохтиниң аяли гүзәлнур ханим, даириләрниң өзи вә адвокатниң илһам әпәнди билән көрүшүшигә йәнила йол қоймайватқанлиқини билдүрүш билән биллә, норуз мәзгилидә өзигә қаритилған назарәт вә чәклимиләрниң техиму күчәйгәнликини билдүрди.

Америка президент ханими мишал обама өткән пәйшәнбә хитай зияритини башлиди. Мәлум болушичә, 1 - ханим мишел обаманиң 19 - марттин 26 - мартқа қәдәр давамлишидиған зиярити җәрянида бейҗиңдики кишилик һоқуқ актиплири вә әрздарлар тәқип астиға елинған яки бейҗиңдин чәтләштүрүлгән.

Радиомиз игилигән әһваллардин мәлум болушичә, бейҗиңдики кишилик һоқуқ паалийәтчилирини вә әрздарларни тәқип қилиш хитайниң 18 - қурултийидин илгирила күчәйтилгән болуп,1 - марттин илгирила уларниң бәзилири өйигә нәзәрбәнд қилинип, наразәт қилиш күчәйтилгән болса, тибәт аял язғучиси воесер қатарлиқ йәнә бир қисим зиялийлар бейҗиңдин чәтләштүрүлүп, “мәҗбурий саяһәт” қилдурулған.

Радиомиз зияритини қобул қилған гүзәлнур ханим, норуз мәзгилидә өзиниң вичат, скайпе қатарлиқ аммиви алақә ториниң тақиветилгәнликини, униң өйи әтрапиға орунлаштурулған сақчиларниң көпәйтилип, илгири бу өйгә даим келип туридиған достларниң ишик алдида назарәттә турған сақчиларниң тосқунлуқиға учраватқанлиқини билдүрүш билән биллә, бу аилиниң йеқин дости тибәтлик язғучи воесер ханимниң мәҗбурий һалда тибәткә саяһәткә әвәтиветилгәнликини билдүрди.

Радиомиз хитай бөлүминиң 24 - март дүшәнбә күнидики хәвиридә дейилишичә, мишал обаманиң хитай зиярити мәзгилидә, мишал обама билән көрүшүш үчүн сәндуңдин бейҗиңға кәлгән әрздар лу чию мей вә шүдали қатарлиқ иккәйләнму, 20 - март күни сақчилар тәрипидин мәҗбурий һалда хаңҗуға саяһәткә елип кетилгән. Мәлум болушичә бу икки әрздар мишал обама ханимниң бейҗиңдики гугуң хан ордиси мозийханисида зиярәттә болидиғанлиқини аңлиғандин кейин, телефонда мәслиһәтлишип гугуң хан ордисиға берип мишал обама билән көрүшмәкчи болған. Әмма,уларниң телифонда сөзләшкән сөзи сақчилар тәрипидин сезилгәндин кейин, даириләр гугуң мозейханисиға мәхсус адәм әвәтип, бу иккәйләнни хаңҗуға “мәҗбурий саяһәт” кә елип кәткән. Мәлум болушичә, бу икки әрздар йеқинда америкиға бир йиллиқ саяһәт визаси алған болсиму, әмма уларниң паспорти бикар қилинғанлиқи үчүн, америкиға келиш чүши көпүккә айланған.

Гүзәлнур ханим йәнә, даириләрниң йеқиндин буянқи назарити вә бесими қаттиқ болғанлиқи үчүн, өзиниң илһам тохтиниң адвокати ли фаңпиң әпәнди биләнму көрүшәлмәйватқанлиқини билдүрди.

Гүзәлнур ханим йәнә өзиниң нөвәттики иқтисадий әһвали һәққидиму тохтилип, илһам әпәндиниң мәктәп тәрипидин берилидиған мааши үрүмчи сақчи даирилириниң буйруқи билән тоңлитиветилгәнлики үчүн, мушу күнләрдә еғир роһи бесимға учриғандин башқа, иқтисадий бесимғиму учраватқанлиқини билдүрди.