Kériyening siyek yézisida hijapqa qol uzatqan xitay sékritar, hijaplan'ghan qizning akisidin dekkisini yégen

Ötken peyshenbe küni kériye nahiyisining siyek yéziliq partkom sékritari yen chigang, motosiklitta yoldishining keynide olturup kitiwatqan bir hijablan'ghan ayalning aldini tosqan؛ ayalning yoldishi sékritarning tosushigha qarimay yolini dawam qilghan, sékritar aptomobili bilen motosiklitqa min'giship kétiwatqan ayalning arqisidin qoghlighan. Hijaplan'ghan ayal öyining aldigha kelginide sékritar arqisidin yétiship kélip uning béshidiki léchekke qol uzatqan؛ del bu chaghda ayalning akisi abliz obulhesen öyidin étilip chiqip sékritarning yanpishigha birni tepken؛ sékritar abliz obulhesenning yénida paltimu barliqini körgendin kéyin qorqqinidin hushidin ketken. 15 Minutning ichide neq meydan'gha yétip kelgen xitay qoralliq küchliri xitay sékritarni doxturxanigha, abliz obulhesen we uning singlisi büwiniyaz obulhesenni qamaqxanigha élip mangghan.

Bu weqening tepsilatini, neq weqe yüz bergen kent sékritarining éghizidin anglaysiler.

Hörmetlik radi'o anglighuchilar, xitay yéngi diniy cheklimilirini élan qilghandin kéyin, chet'ellik mutexessisler bu tüzümning weziyetni ongshiyalmaydighanliqini, eksiche, qarshiliq heriketlirini téximu ulghaytish we keskinleshtürüsh éhtimali barliqini otturigha qoyghan idi. Biz birqanche kündin béri xewer qiliwatqan weqeler, xotenning peqet chet bir yézisida yüz bergen weqeler bolup, bu ehwal, mutexessislerning mezkur perizining toghriliqini ispatlimaqta.