Hijabqa qol uzatqan yéza bashliqini tillighan zöhregül memtimin 3 yilliq késilgen

Muxbirimiz shöhret hoshur
2014-12-22
Élxet
Pikir
Share
Print
Tömür réshatkiliq hoyligha solan'ghan hijaplan'ghan Uyghur ayalliri.
Tömür réshatkiliq hoyligha solan'ghan hijaplan'ghan Uyghur ayalliri.
RFA/Ruqiye


Kériye nahiyisining siyek yézisida yéqinqi 6 ay ichide az dégende minggha yéqin ayalning béshidiki léchek mejburiy éliwétilgen, bu jeryanda mejburlan'ghan ayal we uning a'ile - tawabi'atliri bilen xitay saqchiliri we xadimliri otturisida köp qétim jidel - majira we toqunushlar yüz bergen. Majiralardin biride sabiq dölet xizmetchisi zöhregül memtimin béshidiki léchekke qol uzatqan yéza bashliqi memetjanni tillighan. Zühregülning bu qilmishi üchün, bu yil 7 - ayda siyek yézisida sot échilip uninggha qamaq jazasi bérilgen؛ sotqa uning a'ile - tawabi'atliri qatnashturlmighan. Melum bolushiche, deslepte kériye, uningdin kéyin niye qamaqxanisida tutup turulghan zöhregül memtimin nöwette ürümchidiki bir ayallar türmiside jaza mudditini ötimekte.

Melum bolushiche, zöhregül memtimin 1996 - yili xoten wilayetlik téxnik ishchilar mektipini püttürgen. U bir mehel anisining xizmet orni bolghan yéziliq teminat soda kopiratipida ishligendin kéyin ishtin boshitilghan, arqidin u, yéziliq igilik bashqurush idarisigha ishqa chüshken؛ yene melum mezgildin kéyin bu xizmet ornidin ayrilip ürümchige yötkilip tash sodisi bilen shughullan'ghan. Ürümchidiki mezgilide uchrashqan dost - buraderlirining tesir körsitishi bilen hidayet yoligha mangghan zöhregül memtimin, bu yil yurti kériyening siyek yézisidiki birqanche sorunda köpchilikning telipige bina'en saghlam ewlad terbiyelesh heqqide tebligh qilghan. Atalmish qanunsiz diniy pa'aliyet bilen shughullinish gumani bilen tutqun qilin'ghan zühregul memtimin béshidiki lichekni éliwétishke zorlighan yéza bashliqini tillighan. Uning bu qilmishi bu yil 7 - ayda siyek yézisida échilghan sotta, 3 yilliq késilishige seweb bolghan.

Toluq bet