Güzelnur xanim ilham toxtining adwokatini téxi békitmigenlikini bildürdi

Güzelnur xanim da'irilerning ilham toxti bilen birlikte tutup ketken oqughuchilardin yene töt oqughuchining yenila qoyup bérilmigenlikini, bu oqughuchilarning ata-anilirining balilirining ehwalini güzelnur xanimdin sürüshtürüwatqanliqini we özining bu oqughuchilarning istiqbalidin téximu ensirewatqanliqini bildürdi.

15-Yanwar küni ilham toxti ependi we uning birqanche oqughuchisining tutqun qilin'ghanliq xewiri tarqalghandin buyan, uning ayali güzelnur xanim radi'omiz Uyghur bölümining ziyaritini qobul qilip, bu a'ilining ilham toxti tutqun qilin'ghandin kéyinki ehwalini anglitip kelmekte. Aldinqi qétimliq ziyaretlirimizde güzelnur xanim yene özining ilham toxti we uning bilen bille tutqun qilin'ghan oqughuchilarning dérikini élishqa tirishiwatqanliqini bildürgen idi.

Bügünki ziyaritimizde güzelnur xanim, ilham toxtining dostlirigha hawale qilish netijiside li fangting ependining ilham toxti üchün adwokat bolushni qobul qilghanliqini, emma adwokat li fangting ependi hazir béyjingda bolmighanliqi üchün, özining peqet téléfonda li fangting ependi bilen birla qétim paranglashqanliqini bildürüp, li fangtingdin bashqa yene chet'ellik we xitaylardin bolup birnechche adwokatning ilham toxti üchün adwokat bolushni xalaydighanliqini bildürgen bolsimu, emma özining téxi axirqi qararni bermigenlikini bildürdi.

18-Yanwar küni özini béyjingliq dep tonushturghan shyé yenyi isimlik bir xitay adwokat boshün torida ochuq xet élan qilip, özining xitaydiki bir adwokat bolush süpiti bilen, ilham toxti ependining kishilik heq-hoquqining ayaq-asti qilinishigha qarap turalmaydighanliqini we ilham toxti üchün adwokat bolushni xalaydighanliqini bildürgen idi.

Adwokat shié yenyi boshün torida élan qilghan ochuq xétide: “Men junggoluq adwokat bolush süpitim bilen, junggoning qanunigha asasen proféssor ilham toxtigha qanuniy jehettin yardem qilip, uning adwokati bolushni xalaymen. Men yene shundaq bayanat bérimenki, ilham toxti ependining kishilik heq-hoquqlirini depsende qilishqa bolmaydu. Qanun orunliri uning kishilik heq-hoquqigha hörmet qilishi kérek, ular junggo qanunida belgilen'gen puqralarning sözlesh erkinliki, étiqad erkinliki, tetqiqat erkinliki, ijadiyet erkinliki we uchur erkinliki qatarliq belgilimilerge emel qilishi kérek. Qanun boyiche ish qilishi, mesilini siyasiylashturmasliqi kérek. Shundaqla qanuniy belgilimiler boyiche uchurda ashkara bolushi, ehwalning tereqqiyatini sirtqi dunyagha ashkarilishi shert. Men yene ilham toxti ependining a'ilisidikiler we bu ishtin ensiresh ichide turghan jem'iyettiki herqaysi dostlardin hal soraymen” dégen bayanlarni bergen.

Güzelnur xanim bayanida özining shyé yenyining bu ochuq xéti heqqide béyjingdiki dostlar arqiliq xewer tapqanliqini bildürüp, ilham toxti üchün köngül bölüwatqan barliq dostlargha rehmitini éytish bilen bille, yene ilham toxti ependi üchün adwokatliqni üstige alghuchining choqum ilham toxtining ishlirini yaxshi bilidighan, uning gunahsizliqini ispatlash üchün küch chiqiralaydighan, tesir da'irisi birqeder küchlük bolghan adwokat bolushi kéreklikini tekitlep, bu jehette yenila ilham toxtini yéqindin bilidighan béyjingdiki dostlar bilen meslihetlishidighanliqini tekitlidi.

Söhbitimiz jeryanida güzelnur xanim yene, da'irilerning ilham toxti ependi we shu küni tutqun qilin'ghan oqughuchilarning nege qamalghanliqi heqqide uchur bérishni ret qilghanliqini, emma ürümchidin kelgen bir saqchining béyjingda yene bir mezgil turidighanliqini éytqanliqini bildürdi.

Güzelnur xanimning bildürüshiche, nöwette tutqun qilin'ghan 6 neper oqughuchining ikkisi qoyup bérilgen. Emma atikem rozi we yene 3 neper oghul oqughuchi qoyup bérilmigen. Melum bolushiche, oqughuchilarni soraq qilghan saqchi özining ürümchidin kelgenlikini we béyjingda yene 6 ay etrapida turushi mumkinlikini bildürgen. Saqchilar yene, qoyup bérilgen ikki neper oqughuchini héchqandaq metbu'atning ziyaritini qobul qilmasliqqa we torda ilham toxti heqqide héchqandaq uchur bermeslikke alahide agahlandurghan.

Güzelnur xanim söhbitimiz axirida yene, özining ilham toxti ependining ehwalidin, shuning bilen bille bu qétim tutqun qilin'ghan oqughuchilarning ehwalidin ensiresh ichide turuwatqanliqini bildürüp, her sahe kishilirini ilham toxti ependi we tutqun qilin'ghan oqughuchilarning ehwaligha yéqindin köngül bölüshke chaqirdi.