Ilham toxti bilen tutqun qilin'ghan oqughuchilar a'ilisi saqchilarning uqturushini tapshuruwaldi

Muxbirimiz méhriban
2014-02-24
Share
perhat-xalmurat-uyghurbiz.jpg Uyghurbiz torining yéziq tehriri, merkiziy milletler uniwérsitéti magistir aspiranti perhat xalmurat.
uyghurbiz

Radi'omiz igiligen eng yéngi uchurlardin melum bolushiche, 15-yanwar küni ilham toxti ependi bilen birlikte tutqun qilin'ghan oqughuchilardin üch oqughuchining a'ilisidikiler ürümchi saqchi da'irilirining uqturushini tapshuruwalghan. Emma ilham toxti ependi heqqide da'iriler yenila héchqandaq uchur bermigen.

24-Féwral küni merkizi milletler uniwérsitétining dotsénti ilham toxti ependi we uning oqughuchiliri tutqun qilin'ghinigha 40 kün tolghan kün. Gerche da'iriler ilham toxti ependi heqqide uning a'ilisidikilerge héchqandaq uchur bermigen bolsimu, emma ilham ependi bilen bille tutqun qilin'ghan 3 oqughuchining a'ilisidikilerning saqchilarning uqturushini tapshuruwalghanliqi melum boldi.

Ehwaldin xewerdar kishilerning bildürüshiche, ilham toxti ependi bilen birlikte tutqun qilin'ghan oqughuchilardin saqchilarning uqturushini tapshuruwalghan üch oqughuchining ata-aniliri nöwette balilirining ehwalini sürüshtürüsh üchün ürümchige kelgen. Emma saqchi da'iriliri ularning baliliri heqqide yenimu köp uchur bérishni ret qilghan hem ularning baliliri bilen körüshüshige yol qoymighan.

Melum bolushiche, eyni chaghda ilham toxti bilen bir künde tutqun qilin'ghan besh neper oqughuchidin abduqéyum, shöhret, perhat qatarliq üch oqughuchining a'ilisi balilirining tutqun qilin'ghanliqi heqqide uqturush tapshuruwalghan. Uqturushta bu oqughuchilarning 15-yanwar küni tutqun qilin'ghanliqi heqqidila déyilgen bolup, ularning néme sewebtin tutqun qilin'ghanliqi heqqide héchqandaq izahat bérilmigen.

24-Féwral düshenbe küni radi'omiz Uyghur bölümining ziyaritini qobul qilghan güzelnur xanim, da'irilerning uninggha éri ilham toxti ependi heqqide yenila héchqandaq uqturush ewetmigenliki üchün, adwokat li fangting arqiliq ilham ependining ehwalini munasiwetlik orunlardin sürüshtürüsh qararigha kelgenlikini bildürdi.

Güzelnur xanim bayanida yene, ilham toxti ependi ishlewatqan béyjing milletler uniwérsitétiningmu nöwette ilham toxti we uning bilen bilen bille tutqun qilin'ghan oqughuchilar heqqide héchqandaq ipade bildürmigenlikini ilgiri sürüp, özining mektep da'iriliridin ilham toxti ependi we uning oqughuchilirining ehwalini sürüshtürüshni telep qilidighanliqini bildürdi.

Ilham toxti ependi Uyghurlarning qanuniy heq-hoquqlirini telep qilip kéliwatqan xelq'aragha tonulghan Uyghur öktichi ziyaliysi. U birqanche yildin buyan özi qurghan Uyghurbiz torida élan qilghan maqaliliri we chet'el metbu'atlirining ziyaritini qobul qilghinida, Uyghurlarning nöwettiki weziyiti heqqide toxtilip, xitay hökümitining Uyghurlargha qaratqan milliy siyasitini tenqid qilghan shundaqla Uyghurlarning qanunda belgilen'gen aptonomiyilik hoquqlirining heqiqiy halda emeliylishishi kéreklikini tekitlep kéliwatqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet