Güzelnur xanim: mektep ilhamning ma'ashini toxtatti, nazaret we rohi bésim oghlumni yürek ajizliqigha giriptar qildi

Muxbirimiz méhriban
2014-05-15
Share
ilham-toxti-muash-toxtutush-uqturush.jpg Ilham toxti ependining mekteptin bérilidighan ma'ashining toxtitilghanliqi heqqidiki yazma uqturush. 2014-Yili may.
RFA

Güzelnur xanim 15-may küni radi'omiz ziyaritini qobul qilip, mektep da'irilirining uqturush chüshürüp éri ilham toxtining ma'ashini resmiy toxtatqanliqi we 8 yashqa tolmighan chong oghlining yürek ajizliqigha giriptar bolushi bu a'ilige éghir külpetlerni élip kelgenlikini bildürdi.

Güzelnur xanimning bildürüshiche saqchilarning ilham toxtini nareside balilarning köz aldida tutqun qilishi we töt aydin buyan karidorda yétip-qopuwatqan nazaretchi saqchi balilarda qorqunch tuyghusini téximu kücheytiwetken bolup, bu sewebtin balilar kéchiliri yighlaydighan haletke kelgen. Doxturning bildürüshiche chong oghlining yürek ajizliqi késilimu uzundin buyan dawamlashqan éghir rohi bésim sewebidin shekillen'gen.

Yéqinqi birqanche yildin buyan xelq'aragha we xitay puqralirigha Uyghurlarning ehwalini anglitip, xitay da'iriliridin Uyghurlarning qanuniy heq-hoquqlirini telep qilip kéliwatqan musteqil tetqiqatchi ilham toxti ependi, bu yil 15-yanwar küni béyjingdiki öyidin tutqun qilin'ghandin buyan, bu a'ile éghir iqtisadiy bésim we rohi bésimgha duch kelmekte.

Peyshenbe küni radi'omiz Uyghur bölümi ziyaritini qobul qilghan güzelnur xanim, mektep kadirlar bölümining 25-aprél küni uni chaqirtip, ilham ependining mekteptin bérilidighan ma'ashining toxtitilghanliqi heqqidiki yazma uqturushni uninggha bergenlikini bildürdi.

Güzelnur xanimning bildürüshiche, mektep da'iriliri uninggha ilham ependining qolgha élinishigha uning öz aldigha shexsiy qurghan "Uyghurbiz" tor békiti seweb bolghanliqi üchün mektepning ilham ependining ishlirini sürüshtürüsh wezipisining yoqluqini bildürgen.

Ular yene ilham toxtining 20 nechche yilliq xizmet istazhi üchün bashqa tölem pul bérilmeydighanliqini eskertip, peqet ikki balining béqish heqqi üchün xelq ishlar idarisi teripidin bérilidighan 2000 som xelq pulining 5-aydin bashlap qoshumche bérilidighanliqini uqturghan.

Güzelnur xanim yene nöwette éghir iqtisadiy bésimdin bashqa yene ilham ependining chong oghlining yürek ajizliq késilige giriptar bolushimu, bu a'ilini parakendichilikke salghanliqini bildürüp, chong oghlini bir aydin buyan mektepke aparmay, doxturxanida okul urghuzup dawalitiwatqanliqini bayan qildi.

Doxturning oghli heqqidiki di'agnozi toghriliq toxtalghan güzelnur xanim, ilham ependining nareside balilarning köz aldida tutup kétilishi we ularni 24 sa'et nazaret qiliwatqan saqchilarning kéchisi karidorgha kariwat qoyup ularning ishiki aldida uxlishi qatarliq amillarning balilarda éghir rohi bésim peyda qilip, balilar kéchisi uxlawatqinida qara bésip yighlap oyghinidighan bolup qalghandin bashqa yene, chong oghlining yürek ajizliq késilige giriptar bolghanliqini bildürdi.

Da'irilerning bu a'ilige keltürgen her xil bésimlirigha naraziliqini bildürgen güzelnur xanim yene, özining xelq'ara metbu'atlargha heqiqiy ehwalni bayan qilish iradisidin yanmaydighanliqini we adwokat arqiliq munasiwetlik orunlargha naraziliq erzi bérishke teyyarliniwatqanliqini bildürdi.

Xitay hökümitidin Uyghurlarning qanuniy heq-hoquqlirini telep qilghan ilham ependi 15-yanwar küni béyjingdiki öyidin tutqun qilin'ghinigha töt aydin ashqan bolsimu, da'iriler hazirghiche uning a'ilisidikilerning we adwokatining uning bilen körüshüshige yol qoymay kelmekte.

Xitay da'iriliri uning bölgünchilikke qutratquluq qilish gumani bilen qolgha élinip tekshürülüwatqanliqini bildürgen bolsimu, emma xelq'ara kishilik hoquq teshkilatliri we gherb démokratik döletliri uning tinchliq yoli arqiliq öz millitining qanuniy heq -hoquqlirini telep qilghan bir ziyaliy ikenlikini tekitlep, xitay hökümitidin ilham toxtini gunahsiz dep qoyup bérishni üzlüksiz telep qilip kelmekte.

Ilham toxti ependi amérika qelemkeshler jem'iyiti teripidin bérilgen 2014-yilliq "Goldimish erkinlik mukapati" gha érishken bolup, 5-may küni nyu yorkta ötküzülgen murasimda, dadisigha wakaliten mukapatni tapshuruwalghan amérika indi'ana uniwérsitétining oqughuchisi jewher ilhammu öz nutqida, dadisi tutup kétilgendin buyan bu a'ilining béshigha éghir iqtisadiy we rohi bésim kelgenlikini, bolupmu ikki ukisining téléfonda dadisining gépi chiqsila yighlishi, uning yürikini téximu qattiq ézidighanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet