Güzelnur xanim ilham toxtining türmidiki ehwali we 2-qétimliq sotning teyyarliqini anglatti

Muxbirimiz méhriban
2014.11.03
guzelnur-ilham-toxti-sot-urumchi.jpg Güzelnur xanim éri ilham toxtining sotigha qatnishish üchün aldida. 2014-Yili 17-séntebir, ürümchi.
AFP

Ürümchi ottura sot mehkimisi 23-séntebir küni meshhur Uyghur ziyaliysi ilham toxtini atalmish “Döletni parchilash, qutratquluq qilish” jinayiti bilen muddetsiz qamaq jazasigha höküm qilghan idi. Sottin kéyin ilham toxti we uning a'ilisidikiler naraziliq erzi sunup, qayta sot échishni telep qilghan. Radi'omiz ziyaritini qobul qilghan güzelnur xanim ilham toxtining türmidiki yéqinqi ehwali we 2-qétimliq sotning teyyarliqini anglatti.

Ilham toxtining ayali güzelnur xanimning bildürüshiche, yéqinda Uyghur aptonom rayonluq yuqiri sot mehkimisi ilham ependining ürümchi ottura sot mehkimisi élan qilghan muddetsiz qamaq jazasi hökümige qarita sun'ghan naraziliq erzini qobul qilip, 2-qétimliq sot échishni qarar qilghan. Ötken heptining axiri ilham toxtining adwokati li fangping ürümchige yétip barghan we ilham toxti bilen birlikte 2-qétimliq sotning teyyarliq ishlirini bashlighan.

Güzelnur xanim ilham toxtining yéqinqi ehwali heqqide adwokat li fangpingdin anglighan ehwallarni bayan qilip, nöwette ilham ependining put, qoligha kishen sélin'ghan halette Uyghur aptonom rayonluq yuqiri sot mehkimisige qarita yézilghan 100 nechche betlik naraziliq erzini tamamlighanliqini, adwokattin ilham ependige ewetilgen qishliq kiyimlerni türme da'iriliri yenila qobul qilishni ret qilghanliqi üchün, özining ilham ependining salametlik ehwalidin ensirewatqanliqini bildürdi.

Güzelnur xanim bayanida, türme da'irilirining néme üchün ilham ependining bir mehbus érishishke tégishlik eng töwen derijidiki kishilik heq-hoquqlardinmu mehrum qiliwatqanliqigha naraziliqini ipadilep, ilham toxtining türmidiki ehwaligha dunya jama'etchilikining, bolupmu özini “Qanun döliti” dep élan qilip, “Qanun boyiche dölet bashqurush”ni tekitlewatqan junggo hökümitining jiddiy diqqet qilishi kéreklikini tekitlidi.

Güzelnur xanim yene, özining we balilarning nöwettiki ehwali heqqide toxtilip, ilham ependining ma'ashi toxtitilip, balilar üchün iqtisad qilip qoyghan 850 ming som xelq pulining da'iriler teripidin élip kétilgenliki, éri tutqun qilin'ghandin kéyin, yürek ajizliqi késilige giriptar bolghan 8 yashliq oghlining dawalinish arqiliq bir'az yaxshi bolghanliqi, emma saqchilar a'ililikler qorusida yenila kéche-kündüz nazaret qilishni dawamlashturuwatqanliqi üchün, bu ehwallarning özige we balilargha yenila éghir rohi bésim élip kéliwatqanliqi qatarliqlarni anglatti.

Xitay da'iriliri bu yil 15-yanwar küni meshhur Uyghur ziyaliysi ilham toxtini béyjingdiki öyidin tutqun qilip, uni “Bölgünchilikke qutratquluq qilish” jinayiti bilen eyibligen. Ilham toxti tutqun qilin'ghandin kéyin, xelq'ara jem'iyet ilham toxtining gunahsizliqini tekitlep, xitay da'iriliridin uni qoyup bérishni qayta-qayta telep qilghan bolsimu, emma ürümchi ottura sot mehkimisi 23-séntebir küni sot échip, uni muddetsiz qamaq jazasigha höküm qilghanliqini élan qilghan idi. Ilham ependi we uning a'ilisidikiler ürümchi ottura sotining hökümige qayil bolmay naraziliq erzi sun'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.