Әнқәрәдә илһам тохтиға берилгән наһәқ җазаға қарши намайиш өткүзүлди

Ихтиярий мухбиримиз арслан
2014-09-29
Share
ilham-toxti-turkiye-namayish.jpg Хитай сот мәһкимисиниң илһам тохти әпәндигә устидин чиқарған наһәқ җазасиға наразилиқ билдүрүп елип берилған намайиштин көрүнүш. 2014-Йили сентәбир, әнқәрә.
RFA/Arslan

Илһам тохтиға берилгән наһәқ җазаға қарши түркийәниң пайтәхти әнқәрә шәһиридә намайиш елип берилди. Намайишни шәрқий түркистан мәдәнийәт вә һәмкарлиқ җәмийити, түркийә кадирлар уюшмиси, мәзлум дәр җәмийити қатарлиқ үч тәшкилат бирликтә уюштурған болуп, намайишқа уйғур вә түркләрдин болуп көп санда киши қатнашти.

Намайишчилар қоллирида, ишғалийәт йоқалсун, шәрқий түркистан хәлқигә әркинлик, шәрқий түркистанға әркинлик, хитай уйғурларға қарши йүргүзүватқан бесим сияситини тохтатсун! дегәнгә охшаш шоарлар йезилған чоң һәҗимлик пилакатларни көтүргән һалда, илһам тохтиға әркинлик дегәнгә охшаш шоарларни товлап хитайниң әнқәрәдики баш әлчиханиси алдиға топланди.

Намайишчилар аталмиш хитай сот мәһкимисиниң илһам тохтиға наһәқ, дәлил испати толуқ болмиған җинайәтләрни артиш арқилиқ муддәтсиз қамақ җазасиға һөкүм қилғанлиқини әйиблиди.

Бәзи намайишчилар қоллирида илһам тохти вә абдувәли аюпниң чоң һәҗимдики рәсимлирини көтүрүвалған болуп рәсимләрниң астиға, илһам тохтиға әркинлик, абдувәли аюпқа әркинлик дегәндәк хәтләр йезилған.

Намайиш җәрянида ахбарат елан қилиш йиғини ечилған болуп, шәрқий түркистан мәдәнийәт вә һәмкарлиқ җәмийитиниң әнқәрә шөбә башлиқи хәйруллаһ әпәндигил әпәнди баянатини оқуп өтти.

Баянатта хәйруллаһ әпәндигил әпәнди, үрүмчи оттура сот мәһкимисиниң илһам тохтиға муддәтсиз қамақ җазаға һөкүм қилиши хитайда қанунсизлиқниң бир мисали болғанлиқини, бу,илһам тохтиға охшаш бир алим вә зиялийниң һаятини набут қилғанлиқини ипадилиди вә "наһәқ муддәтсиз қамақ җазасиға һөкүм қилинған илһам тохти қериндишимиз вә шуниңға охшаш башқа тутқун қилинған барлиқ қериндашлиримизниң һәқ-һоқуқлирини қайтуруп елиш үчүн хәлқара саһәдиму ахириғичә күрәш қилимиз" деди.

Хәйруллаһ әпәндигил әпәнди мундақ деди: "хитайларниң яки уйғурларниң һәқ-һоқуқлирини қоғдаш яки сөз қилишини җинайәт вә топилаңчилиқ дәп қарайдиған вә әң еғир усулда җазалаш йолини таллиған хитай даирилири, үрүмчи вә йәкән елишқу вәқәлиригә охшаш чоң вәқәләрниң қайтидин мәйданға келишини халайду.

Ахбарат елан қилиш йиғинидин кейин хитай байриқи көйдүрүлди, намайишчилардин бир һәйәт хитай әлчиханисиниң алдиға қара чәмбирәк қойди, қара чәмбирәкниң үстигә шәрқий түркистанлиқлар җәмийити дәп йезилған. Түркийәдә қара чәмбирәк қоюш инсанийәткә қарши җинайәт ишлигәнликниң ипадисини көрситиду.

Хәйруллаһ әпәндигил әпәнди, илһам тохтиниң "мени, түрмидә өзини өлтүрүвалди десә, һәргизму ишәнмәңлар" дегән сөзини тилға елип, бу, униң түрмидә психик җәһәттә қанчилик еғир дәриҗидә бесим астида қалғанлиқини көрситиду, деди.

Үрүмчи оттура хәлқ сот мәһкимисидә 9-айниң 17-18-күнлири сот ечилған болуп, сотта илһам тохти өзигә артилған җинайәтләрни рәт қилип етираз билдүргәндин кейин, сот нәтиҗисиз ахирлашқан иди. Илһам тохти 9-айниң 23-күнидики сотта пүтүн әйибләшни рәт қилған болсиму, аталмиш сот мәһкимиси униң барлиқ мал-мүлкини мусадирә қилип, уни муддәтсиз қамақ җазасиға һөкүм қилди.

Биз, бу намайиш тоғрисида намайишқа қатнашқан уйғур зиялий азадҗан буғра әпәнди билән сөһбәт елип бардуқ. Азадҗан буғра әпәнди илһам тохтиниң наһәқ түрмигә қамалғанлиқини, буниңға қарита наразилиқини ипадиләп намайишқа қатнашқанлиқини, қолидин чоң иш кәлмисиму, өзиниң бир уйғур болуш сүпити билән намайишқа қатнишип, илһам тохтини қоллиғанлиқини, бу арқилиқ өзини виҗдани алдида раһәт һес қилғанлиқини ипадилиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт