Kériyediki 20-aprél sük weqeside 6 kishi ölgen, ikki kishi esirge élin'ghan

Muxbirimiz shöhret hoshur
2015.04.28
Share on WhatsApp
Share on WhatsApp
xitay-saqchi-herbiy-maniwer-xoten.jpg Xitay qoralliq küchlirining “Térrorluqqa zerbe bérish” manéwiridin körünüsh. 2014-Yili 6-iyun, xoten.
AFP


Shiwésiyediki sherqi türkistan teshwiqat merkizining kériyede 20 - april küni yuz bergen sük weqesi heqqide aldinqi küni tarqatqan ikkinchi qétimliq xewiride, melum bir öyde mudapi'elinp turghan 8 pida'iyning teslim bolushni ret qilghanliqi, ular mudapiyelinip turghan öyning xitay saqchiliri teripidin bombilan'ghanliqi we bu partlashta 8 neper pida'iyning ölgenliki xewer qilin'ghan idi. Muxbirimizning bu heqte qayta éniqlishi dawamida 6 kishining ölgenliki, ikki kishining esir chüshkenliki؛ bu 8 kishidin birining ayal ikenliki aydinglashti. Emma, weqening qozghatquch sewebi, neq dawam qilghan orni qatarliq tepsilatlar heqqide oxshimighan uchurlar otturigha chiqti.

Hörmetlik radi'o anglighuchilar, biz sherqi türkistan teshwiqat merkizining yuqiriqi uchurigha asasen, kériyening len'ger yéza sük kentidiki kent we mehelle bashliqlirigha téléfon qilduq. Ashkarilinishiche, bu weqe kent we mehelle bashliqlirighimu tepsiliy bildürülmigen. Da'iriler kent bashliqlirigha weqede béligha bomba tangghan 5 - 6 kishining ölgenlikini ashkarilighan we bu uchurni tarqatmasliq heqqide agahlandurghan. Emma da'iriler bélige bomba tangghuchilarning kimler ikenliki, qandaq ehwal astida bombini partlatqanliqi, partlighan bombida saqchilarning ziyan'gha uchrighan - uchrimighanliqi heqqide héchnéme démigen, saqchilar peqet yézini qamal qilish arqiliq bir tereptin weqege chétishliq gumandarlarni tépish we tutushqa herket qilsa, yene bir tereptin weqe heqqidiki uchurni kontrol qilghan.

Éniqlashlirimiz dawamida, yéziliq partkomning weqe yüz bergendin kéyin weqeni aldi bilen mezkur yézida yer höddige alghan xitay köchmenlirige uqturghanliqi we ularni mudapi'elinishke chaqirghanliqi ashkarilandi. Biz buninggha asasen sük kentide yer bashquruwatqan zey jyenjün isimlik bir xitay höddigerni ziyaret qilduq. Uning bayan qilishiche, yéziliq partkom sékritari weqedin kéyin uninggha téléfon qilghan we özini qoghdashni eskertken, emma weqening tepsilati heqqide uningghimu cholta melumat bergen. Bu xitay höddigerning xitayning sékritardin anglishiche, weqede jem'iy 6 kishi ölgen, ikki kishi tirik qolgha chüshken. Sékritar yene bu kishining hemmisining yashlar ikenlikini we arisida bir nepirining ayal ikenlikini ashkarilighan. Zey jyenjün yene, weqe heqqide térrorluq weqesi dep xewerlendürülgen؛ emma atalmish térrorchilarning emeliy heriket dawamida yaki pilan basquchida öltürülgenliki xewerlendürülmigen. Zey jyenjün yene kocha xewerliridin yéziliq hökümetning hujumgha uchrighanliqi we bir xénenlik yer höddgerining hujumgha uchrighanliqi heqqide oxshimighan ikki xil uchurgha érishken. Emma hujumgha uchridi déyilgen xénenlikning kimliki we aqiwiti heqqidimu uchurgha érishelmigen.

Hörmetlik radiyo anglighuchilar, yuqiriqi uchurlardin weqening sük kentide yüz bergenliki, az dégende 6 kishining ölüp, ikki kishining esir élin'ghanliqi aydinglashqan bolsimu, emma weqening neq orni, eger hujum qilish weqesi bolsa, uning hujum nishani yenila sirliqliqini saqlimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.