220 Ming nopusluq kériye nahiyiside 30 mingche kishining lagérda ikenliki ashkarilandi

Muxbirimiz shöhret hoshur
2018.08.30
xoten-yepiq-terbiyelesh-orni.jpg Xotendiki melum yépiq terbiyelesh orni.
Social Media

Xitayning hökümet statistikisi boyiche 220 ming nopusluq kériye nahiyiside 30 mingche kishining yighiwélish lagérida ikenliki ashkarilandi. Melum bolushiche, lagérgha soliwélin'ghan bu 30 mingche kishi nahiyediki 4 yighiwélish lagérida tutup turulmaqtiken.

Hörmetlik radi'o anglighuchilar, beydu uchur ambirida körsitilishiche, kériye nahiyisi 2 bazar 13 yézidin teshkillen'gen bolup, nopusi 220400 etrapida iken. Kériyege qarita élip barghan téléfon ziyaretlirimiz dawamida bu nahiyide 4 orunda yighiwélish lagéri barliqi, bulargha jem'iy 30 mingche kishining soluwélin'ghanliqi ashkarilandi. Melum bolushiche, bir yérim yildin buyan yighiwélin'ghan bu kishiler mezkur lagérlarda kün boyi xitay tili we qanun öginish bilen meshghul iken.

Alaqidar xadim gerche ziyaritimiz jeryanida bu lagérdikilerning xitay tilidin bashqa kespiy téxnika öginiwatqanliqini we bu öginishning ulargha zor menpe'et yetküzüwatqanliqini bayan qilghan bolsimu, emma ularning qeyerde, qandaq menpe'et éliwatqanliqi heqqide héchqandaq melumat bérelmidi, pakitmu körsitelmidi. U hetta bu kentlerdin qoyup bérilgenler bar dep anche-munche anglap qalghanliqini, emma hazirghiche qoyup bérilgen birer kishini özi körüp baqmighanliqini we ularning éniq kimlikinimu anglap baqmighanliqini bayan qildi. 

Yene melum bolushiche, kériye nahiyiside eslide 5 orunda lagér bar bolup, bularning ichide bezi lagérlarning qurulushliri tamamlan'ghan yaki kéngeytilgendin kéyin 4 ke qisqartilghan iken. Bayan qilinishiche, 1‏-terbiyilesh merkizi nahiyilik qamaqxanigha tesis qilin'ghan iken. Kéyinche qamaqxanining yénigha yéngidin qurulush sélip, 2 ‏-terbiyilesh merkizi namida qollan'ghanliqi melum. 3‏-We 4 ‏-terbiyilesh merkizi “Keyfachü”, yeni “Tereqqiyat rayoni” dep atilidighan yéngisheher rayonigha tesis qilin'ghan iken. 

Hörmetlik radi'o anglighuchilar, kériye nahiyisi xitay teshwiqat wastilirida kökke kötürüwatqan we Uyghurlargha ülge qilip körsitilidighan qurban tulumning yurtidur. Qurban tulumning newrisi ruqiye metseydi bu yil 3 ‏-ayda xitayning memliketlik 13 ‏-nöwetlik xelq qurultiyigha qatniship, kériye xelqining bext-sa'adet ichide yashawatqanliqini ilgiri sürgen idi. U shu qétimliq qurultayda yene Uyghur rayonidiki lagérlarning qurulushini pilanlighan we ijra qiliwatqan xitay dölet re'isi shi jinpinggha salam yollighan idi.

Aldinqi künlerdiki éniqlashlirimiz dawamida ruqiye metseydi béyjingda shi jinpinggha minnetdarliq bildürüwatqan mezgilide kériyede ata-anisi tengla lagérgha ekétilgen balilarning nahiye baziridiki atalmish “Perishtiler mektipi” ge sighmastin yéngibagh yézisida “Perishtiler mektipi” ning ikkinchisi qurulghanliqi, bu ikki mektepke jem'iy 3 mingche balining orunlashturulghanliqi ashkarilan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.