Jeyson kennéy: Uyghur we tibetlerning insan heqliri pütün insaniyetning heq-hoquq mesilisi

Kanadaning toronto shehiridiki sherqiy türkistan medeniyet merkizining wekilliri 11-ayning 23-küni kanadadiki kishilik hoquq teshkilatliri teripidin orunlashturulghan diniy heq -hoquq mesilisi yighinigha qatnashti.

Yighinda dunyaning herqaysi jayliridiki diniy erkinlikning depsende qilinish ehwalliri tonushturuldi. Kanada ijtima'iy tereqqiyat we medeniyet ministiri jeyson kennéy her qaysi teshkilat ezaliri bilen uchrashti we ehmiyetlik söz qildi. U, iraq we süriye mesililirini tilgha élip, diniy radikalliqning peyda bolushidiki asasiy seweb diniy étiqadning chetke qéqilishi we hörmet qilinmighanliqi tüpeylidin boluwatqanliqini bildürüsh bilen birge, diniy erkinlikning insanlarning heq-hoquq erkinliki ikenlikini, xitay hökümiti teripidin basturuluwatqan Uyghur, tibet qatarliq xelqlerning insan heqlirining shu xelqningla mesilisi yaki kanadadiki insan heqlirige köngül bölgüchilerning mesilisi bolup qalmay, belki pütün insaniyetning heq-hoquq mesilisi bolushi kéreklikini otturigha qoydi.

Sherqiy türkistan medeniyet merkizining wekilliri ministir jeyson kennéy bilen söhbetliship, Uyghurlarning diniy heq-hoquqliri heqqide kanada hökümitining xitaygha bésim qilishini telep qildi. Biz bu toghrida sherqiy türkistan medeniyet merkizining re'isi haji mamut ependini ziyaret qilduq. Haji mamut bu qétimqi uchrishish toghrisida toxtilip mundaq dédi: “Biz, Uyghurlarning diniy heq-hoquqlirining zulumgha uchrawatqanliqini ministirgha anglatqinimizda, ministir jeyson, xitay hökümitining Uyghurlarning diniy heq-hoquqlirini hörmet qilishi kéreklikini, undaq bolmighanda Uyghurlarni radikallashturushqa seweb bolidighanliqini tekitlidi.”

Uchrishishqa qatnashqan Uyghurlardin torontoda turushluq tahirjan öz tesiratini sözlep mundaq dédi: “Men jeyson kennéyning Uyghur mesilisige, bolupmu diniy heq-hoquqlargha köngül bolidighanliqidin bekmu tesirlendim. Dunyadiki urushlarning, zulum we insanlarning ézilishining, gerche nurghun siyasiy, tarixiy, ijtima'iy we herbiy istratégiyelik sewebliri bolsimu, lékin yene bir seweb, bir dinning yene bir din'gha qarshi bolghanliqidin, bir idé'ologiyening yene bir idé'ologiyeni sighduralmighanliqidin boluwatidu. Shunga xuddi jeyson kennéy tekitligendek, bashqilarning étiqadigha hörmet qilish, erkinlikige hörmet qilish insaniyet dunyasida tinchliq we démokratik barawerlik peyda qilishning asasi. Eger tinchliq we démokratiye emelge ashsa, u chaghda bizmu xitaygha mustemlike bolup qalmayttuq.”