Kucha xaniqatam saqchi xadimi: "Yézimizdin 5 mingche kishi lagérda, téxi birsimu qoyup bérilmidi"

Muxbirimiz shöhret hoshur
2018-08-02
Élxet
Pikir
Share
Print
Xotendiki melum yépiq terbiyelesh orni.
Xotendiki melum yépiq terbiyelesh orni.
Social Media

Muxbirimizning lagérlar heqqide kucha nahiyisige qarita élip barghan téléfon ziyaretliri dawamida kuchaning xaniqatam yéziliq saqchi xadimi bu yézida yighiwélishqa adem apirishning bir aydin béri toxtighanliqi, emma lagérgha élip kétilgen 5 mingche kishidin téxi birsiningmu qoyuwétilmigenlikini ashkarilidi.

Biz Uyghur rayondiki lagérlarning nöwettiki ehwali, bolupmu lagérdin chiqqan yaki chiqiwatqanlarning bar-yoqluqi heqqide melumat élish üchün kucha nahiyisidiki saqchixanilargha téléfon qilduq. Saqchi xadimliri lagérlar heqqide söz échishtin izchil türde özini qachurdi. Kucha nahiye 7-rayon, yeni xaniqatam saqchixanisining xadimi yézida yéqinqi bir ay ichide lagérgha adem apirishning asasen astilighanliqini ilgiri sürdi. Emma u bu astilash yaki toxtashqa éniq némining seweb bolghanliqi heqqide melumat bérelmidi. U peqet yuqirining siyasitide yaxshilinish boluwatqanliqi heqqidiki perizinila otturigha qoydi.

Bu xadim yene lagérda hazirgha qeder mezkur yézidin 5000 bilen 6000 arisida kishilerning "Terbiye" liniwatqanliqi, bularning aldi bir yérim yil, hetta bezilirining 2 yildin buyan solaqliq ikenlikini bayan qildi. Melum bolushiche, lagérdikilerning nöwettiki salametlik ehwali we ularning qachan qoyup bérilidighanliqi yenila éniqsiz iken.

Xaniqitam yézisidiki bir kent amanliq mudirimu öz kentidin 200 che kishining lagérda ikenlikini, bulardin birmu kishining téxi qoyup bérilmigenliki, bashqa kentlerdin qoyup bérilgenlerning barliqi heqqidimu héchqandaq uchur anglimighanliqini bayan qildi. Xaniqatam saqchixanisidiki mezkur saqchi xadimining bayan qilishiche, nöwette ahaliler lagérdiki uruq-tughqanlirini körüshke teshna bolmaqta we körüshüshke iltimas sunush üchün yéziliq saqchixana aldida her küni uzundin uzun öchirette turmaqta iken. 

Hörmetlik radi'o anglighuchilar, yuqirida kuchaning xaniqitam yézisida lagérgha adem apirishning bir aydin béri astilighanliqi, emma lagérgha ekitilgenlerdin birmu kishining téxi qoyuwétilmigenliki heqqide anglitish berduq.

Toluq bet