Kucha nahiyisidiki üch "Lagér" ning orni we qurulmisi heqqide birqisim melumatlar ashkarilandi

Muxbirimiz shöhret hoshur
2018-08-07
Élxet
Pikir
Share
Print
Kishilik hoquq weziyiti közetküchisi, jang shawn isimlik aliy mektep oqughuchisi twitérda xoten laskuydiki yighiwélish lagéri dep körsetken xeritisi.
Kishilik hoquq weziyiti közetküchisi, jang shawn isimlik aliy mektep oqughuchisi twitérda xoten laskuydiki yighiwélish lagéri dep körsetken xeritisi.
Social Media/Shown Zhang

Melum bolushiche kucha nahiye baziridiki 3 "Yighiwélish lagéri" ning hemmisi nahiye bazirining yéngisheher rayonigha tesis qilin'ghan. Atalmish birinchi we ikkinchi terbiyilesh merkizi, eslidiki qamaqxana we tutup turush ornini özgertish arqiliq tesis qilin'ghan bolsa, 3-si, yeni eng chongi nahiyilik partiye mektep bilen qatnash idarisining yénigha sélin'ghan. Lagér égiz tamlar bilen qorshilip, ichidiki ehwallar el-jama'etning közidin yiraq tutulghan.

Xitay da'iriliri Uyghur rayonidiki "Yighiwélish lagérliri" ning mewjutluqini dunyadin yoshurush üchün, bir tereptin uni bir mehel a kespiy téxnika mektipi yaki méhri-shepqet mektipi dégendek funksiyesi we esli mahiyitige yéqin kelmeydighan namlar bilen atap we shu xil wiwiska bilen pedezlep kelgen bolsa yene bir tereptin lagérlarni sheher sirtigha yaki sheherning diqqettin yiraq jaylirigha orunlashturghan. Biz kucha nahiyisidiki 3 lagérning ornini éniqlash üchün, nahiye baziridiki saqchixanilargha téléfon qilduq. 

Melum bolushiche, lagérdiki adem sanining köplüki, uning üstige rayondiki herbir Uyghurning az dégende birqanche a'ile ezasi yaki uruq-tughqanliri lagérda bolghachqa, lagérlar herqaysi nahiye we sheherlerdiki eng meshhur orun'gha aylan'ghan. Emma lagérlar xitayning nöwettiki eng chong dölet mexpiyetlikidin biri bolghanliqi üchün, Uyghurlar arisidiki dölet kadirlirigha nisbeten éytqanda uning heqqide gep qilish, bu heqte melumat bérish we melumat sorash eng sezgür mesililerdin birige aylan'ghan. Shunga bu heqte téléfonimizni qobul qilghan köpinche xadimlar lagérlar heqqide héchnéme bilmeydighanliqi yaki héchnéme dep bérelmeydighanliqini bayan qilip kéliwatqan bolsimu, yene beziler, bu heqte siyasiy qanun ishxanisi yaki edliye idarisidin melumat élishimizni tewsiye qilip keldi. 

Kuchadiki bir saqchi xadimining bayan qilishiche, kuchadiki 3 "Yighiwélish lagéri" kucha nahiye bazirining yéngi sheher rayon tewelikide. Atalmish "Birinchi we ikkinchi terbiyilesh merkizi" ilgiriki qamaqxana we tutup turush merkizining ornigha tesis qilin'ghan. Lagérning eng chongi bolghan "3 -Terbiyilesh merkizi" eslidiki bir bosh orun'gha, yeni qatnash idarisi we partiye mektipi qatarliq orunlarning yénigha yéngidin tesis qilin'ghan. 

Bu xadimning bayan qilishiche, , bu üch lagér tesis qilin'ghan jay nahiye bazar merkizidin 10 kilométir yiraqliqta. Yene melum bolushiche da'iriler bu lagérlarni égiz tamlar bilen qorshash arqiliq bir tereptin lagér ichidiki heriketni we yene bir jehettin u yerde yüz bériwatqan échinishliq ehwallarni el-jama'etning közidin uzaq tutqan. Mezkur xadim qoruning tamlirining égizliki sewebidin lagérning 3‏- we 4‏-qewetlirini körgini bolidighanliqi, töwen qewetler we qoruning ichidiki pa'aliyetlerni körgili bolmaydighanliqini bayan qildi. 

Melum bolushiche, ahaliler ta hazirgha qeder lagérning ichidikilerni lagér qorusigha yaki qoru sirtigha élip chiqqan bir körünüshke shahit bolmighan. Lagérdikilerning kündilik pa'aliyitining lagérning qeyiride qandaq dawam qiliwatqanliqi heqqidimu melumatqa ige bolmighan.

Toluq bet