Londonda xitaygha qarshi naraziliq namayishi ötküzüldi

Ixtiyariy muxbirimiz erkin tarim
2018-06-26
Élxet
Pikir
Share
Print
Londonda xitaygha qarshi ötküzülgen naraziliq namayishidin körünüsh. 2018-Yili 23-iyun.
Londonda xitaygha qarshi ötküzülgen naraziliq namayishidin körünüsh. 2018-Yili 23-iyun.
RFA/Erkin Tarim

Xitayning Uyghurlargha élip bériwatqan éghir bésim siyasitige naraziliq bildürüsh shundaqla dunya jama'etchilikige Uyghurlarning éghir weziyitini anglitish meqsiti bilen 23-iyun küni londonda namayish ötküzüldi. Londondiki xelq'ara kechürüm teshkilatining aldida ötküzülgen namayishqa london Uyghur jem'iyiti mes'ulliri we ezaliridin bolup köp sanda Uyghur ishtirak qildi.

Namayishta en'gliye Uyghur jem'iyitining ezaliri, Uyghurlarning nöwettiki éghir weziyiti toghrisida teyyarlighan xétini aldi bilen kechürüm teshkilatining london shöbisining mes'uligha bergendin kéyin, kechürüm teshkilatining aldida turup, Uyghurlar we Uyghurlarning hazirqi weziyiti tonushturulghan waraqchilarni tarqatti. Biz pa'aliyet heqqide téximu tepsiliy melumat igilesh üchün en'gliye Uyghur jem'iyitining diniy ishlargha mes'ul xadimi kerim zayir ependi we namayishqa qatnishiwatqan Uyghurlar bilen söhbet élip barduq.

Kerim zayir ependi bu heqte ziyaritimizni qobul qilip, en'gliye londonda turushluq kechürüm teshkilati ishxanisi aldida ötküzülgen namayishni bashlashtin burun Uyghurlarning hazirqi éghir weziyiti bayan qilin'ghan yazmini xelq'ara kechürüm teshkilatining mes'uligha tapshurup bergenliki bayan qildi.

Uyghurlar her qétimqi namayishta Uyghurlarni bolupmu Uyghurlarning hazirqi éghir weziyitini tonushturidighan waraqche tarqitip, Uyghurlar toghrisida so'al sorighanlarning so'aligha jawab bergen. Kerim zayir ependi kechürüm teshkilatining aldida waraqche tarqitiwatqanliqini bayan qildi.

Kerem zayir ependi waraqchilarni alghan kishilerning so'allarni sorap Uyghurlarning hazirqi éghir weziyitini bilishke tirishiwatqanliqini bayan qildi.

Namayishqa ishtirak qiliwatqan hemragül xanim pa'aliyetning yaxshi ötüwatqanliqini waraqche tarqitiwatqanliqini bayan qildi.

Ötken yili 7-aydin tartip chet'eldiki Uyghurlarning köpi ata-aniliri we uruq-tughqanliri bilen téléfon bilenmu sözlishelmeywatidu. Ammiwi axbaratlarda bir milyon etrapida Uyghur we bir qisim qazaqlarning lagérlarda tutup turuluwatqanliqi ilgiri sürülmekte. Buninggha naraziliq bildürüsh üchün dunyaning herqaysi jaylirida namayish we bashqa pa'aliyetler ötküzülmekte. Bu xil pa'aliyetlerning xitayning Uyghurlargha élip bériwatqan bésim siyasitining özgirishige tesir körsitelermu? hemragül xanim, xitayning Uyghurlargha élip bériwatqan bésim siyasiti tügigiche namayish qilishni dawamlashturidighanliqini bayan qildi.

Bu pa'aliyetke köp sanda Uyghur balilarmu ishtirak qilghan bolup, 11 yashliq sümeyye bilen söhbet élip barduq. U, wetendiki Uyghurlarni lagérlargha solap, Uyghur qizlirini xitay erler bilen toy qilishqa mejburlawatqanliqini, buninggha naraziliq bildürüsh üchün namayishqa qatnishiwatqanliqini ilgiri sürdi.

En'gliye Uyghur jem'iyiti qayta saylam ötküzüp yéngi rehberlik hey ‘itini qurup chiqqandin kéyin pa'aliyetlirini kücheytiwatqan bolup, "5-Iyul ürümchi" weqesining 9 yilliqi munasiwiti bilen chong namayish ötküzüshke teyyarliq qiliwétiptu.

Toluq bet