Кунмиң һуҗумчиси искәндәр әхәтниң дадиси «мәсилә тапшуруш» қа зорланған

Мухбиримиз шөһрәт һошур
2017-03-17
Елхәт
Пикир
Share
Принт
Күнмиң вәқәси гумандари искәндәр әхәт
Күнмиң вәқәси гумандари искәндәр әхәт
Photo: RFA

Уйғур районида давам қиливатқан «мәсилә тапшуруш» сиясий һәрикитидә кишиләр өзлириниң нөвәттикила әмәс, 10-15 йил аввалқи, өзиниңла әмәс, уруқ-туғқанлириниңму аталмиш мәсилилирини тапшуруш вә бойниға елишқа мәҗбурланмақта. Мәсилә тапшуруш вәһимилик давам қиливатқан җайлардин бери, кучаниң узун йеза сеғиз сөгәт кәнти. Мәлум болушичә, 2013-йили йүз бәргән кунмиң пойиз истансисиға һуҗум қилиш вәқәсиниң баш гумандари искәндәр әхәт, сеғиз сөгәттин болуп, униң дадиси әхәт бу қетимқи мәсилә тапшурушта нуқтилиқ кишигә айланған вә аталмиш хаталиқини бойниға елишқа зорланған.

Дуня уйғур қурултийи диний ишлар комитети мәсули турғунҗан алавудун, радийомизға бу һәқтә пикир баян қилип, мәсилә тапшурушқа тегишлик тәрәпниң бигунаһ пуқралар әмәс, хитай даирилири икәнликини илгири сүрди.

Һөрмәтлик радийо аңлиғучилар, өткән айда радийомизға учур йәткүзгән бир аңлиғучимиз, куча сеғизсөгәттә давам қиливатқан мәсилә тапшуруш һәрикитидә искәндәр әхәт исимлик бир сабиқ мәһбусниң аилә-тавабиатиниң аваригәрчиликкә учраватқанлиқи, болупму гумандарниң дадиси әхәт дегән кишиниң оғлиниң җинайитиниң бирқсимини бойниға елишқа қистиливатқанлиқи һәққидә мәлумат бәргән. Уйғур райони вә хитай өлкилиридә йүз бәргән қанлиқ вәқә вәқәләр һәққидики материялларда көрситилишичә, искәндәр әхәт 2013-йили 3-айниң 1-күни йүз бәргән кунмиң пичақлиқ һуҗум вәқәсиниң баш гумандари болуп, у вәқәдин кейин йүннән алий сот мәһкимиси тәрипидин өлүмгә буйрулуп, җазаси иҗра қилинған. Аридин аз кәм 4 йил өткәндә искәндәрниң қилмиши сәвәблик, дадиси әхәт йәнә бир қетим сораққа тартилған. Мәзкур учурда йәнә дейилишичә, искәндәрниң дадиси бу қетимқи сорақта, вәқә йүз бәргән йилдикидин пәрқлиқ һалда, балисини яхши тәрбийилимигәнлики, балисиниң иш-һәрикитигә көз-қулақ салмиғанлиқи, кунмиңға кәткәнликидин мәлумат бәрмәсилик қатарлиқ бир қатар аталмиш хаталиқлирини бойниға елишқа қисталған. Сеғиз сөгәткә қарита елип барған телефон зияритимиз давамида, юқириқи учурда дейилгәнләрниң тоғрилиқи дәлилләнди. Мәзкур кәнткә мәсул сақчи хадими өзиниң искәндәр әхәтниң дадисини сорақ қилған вә у һәқтә архип турғузғанлиқини паш қилди.

Аңлиғучимиз тәрипидин йолланған юқириқи инкаста баян қилинишичә, бу қетимқи мәсилә тапшуруш долқунида, сеғиз сөгәт кәнтидики бирму киши, бу һәрикәтниң сиртида қалалмиған. Әмма кәнттики чәтәл көргәнләр, җүмлидин тарқақ һәҗ қилғанлар билән сабиқ гумандарлар аилә-тавабиати бу қетимқи һәрикәтниң мәркизи обйекти болған. Бу һәқтә радийомиз зияритини қобул қилған дуня уйғур қурултийи диний ишлар комитети мәсули турғунҗан алавудун әпәнди, уйғур районида мәсилә тапшурушқа тегишлик кишиләрниң бигунаһ пуқралар әмәс, районни идарә қиливатқан хитай даирилири икәнликини тәкитлиди. Уйғур районидики тинчлиқниң хитай ишғалийити билән бузулғанлиқини илгири сүргән турғунҗан әпәнди, мәсилә тапшурушқа тоғра кәлсә, уйғур районида қанлиқ бастуруш елип бериватқан хитай даирилири вә уларниң йәрликтики шериклириниң һесаб бериши керәкликини оттуриға қойди. У бу нуқтида, хитайниң уйғур зиялийси илһам тохтини муддәтсиз кесишини, хитай һесаб беришкә тегишлик җинайәтләрдин бири сүпитидә тилға елип өтти.

Юқиридики улиништин, мухбиримиз шөһрәт һошурниң бу һәқтә тәйярлиған программисиниң тәпсилатини аңлайсиләр.

Пикирләр (0)
Share
Толуқ бәт