Munewwer özUyghur xanim rejep tayyip erdoghan'gha Uyghurlarning weziyitini anglatti

Ixtiyariy muxbirimiz erkin tarim
2018.03.09
Munewwer-Ozuyghur-Xanim-Turkiye-Reis-Jumhuri-Bilen-01.JPG Munewwer özUyghur xanim türkiye dölet re'isi rejep tayyip erdoghan “8-Mart xelq'ara ayallar bayrimi” munasiwiti bilen orunlashturghan yighilishta. 2018-Yili 7-mart. Enqere, türkiye.
RFA/Erkin Tarim

“8-Mart xelq'ara ayallar bayrimi” munasiwiti bilen 7-mart küni etigende türkiye dölet re'isi rejep tayyip erdoghan, chüshtin kéyin türkiye parlaménti insan heq-hoquqliri komissiyonining mes'uli ömer serdar ependi dunyaning herqaysi döletliridin kelgen shundaqla türkiyediki ayallar ammiwi teshkilatlirining wekillirini qobul qildi.

Mezkur qobulda munewwer özUyghur xanim dölet re'isige Uyghurlarning éghir weziyiti toghrisida melumat bergen. U, radiyomiz ziyaritini qobul qilip, bu heqte mundaq dédi: “Dölet re'isi 55 dölettin kelgen ayal wekiller, 7 neper millet wekili, jenubiy afriqining sabiq dölet re'isi nélsun mandélaning kélini we newrisini qobul qildi. Bizni chüsh sa'et 12 din 12 yérimgiche qobul qildi.”

Munewwer özUyghur xanim dölet re'isi rejep tayyip erdoghanning nuqtiliq halda dunyaning herqaysi jayliridiki insan heq-hoquqliri depsendichiliki heqqide toxtalghanliqini bayan qilip mundaq dédi: “Re'is jumhur erdoghan nuqtiliq halda dunyaning herqaysi jayliridiki insan heq-hoquqliri depsendichiliki toghrisida toxtaldi.”

U, türkiye dölet re'isi rejep tayyip erdoghan qisqa söz qilghandin kéyin ayallarni sözge teklip qilghanliqini, özining söz qilip Uyghurlarning hazirqi éghir weziyiti toghrisida melumat bergenlikini bayan qildi we mundaq dédi: “U yerde men shularni dédim. Men sherqiy türkistan ammiwi teshkilatlirigha wakaliten bu yerge kelgenlikimni, pütün sherqiy türkistanliqlarning salimini élip kelgenlikimni éyttim. Uningdin kéyin awazi boghulup qalghan sherqiy türkistanliqlarning yoq bolush xewpige duchar boluwatqanliqini, uning üchün dunyadiki mezlumlarning derdini anglatqan waqtimizda Uyghurlarningmu awazini anglitishimiz kéreklikini tekitlidim.”

Munewwer özUyghur xanim 7-mart küni türkiye dölet re'isi rejep tayyip erdoghanning xanimi emine xanim bilen birlikte wekillerni qobul qilghanliqini, qobul qilish axirlashqandin kéyin özining emine erdoghan'gha kök bayraqta yasalghan sharpa sowghat qilghanliqini bayan qilip mundaq dédi: “Qobul axirlashqandin kéyin emine erdoghan xanimgha sharpa sowghat qildim. Siz bilen burunmu körüshken iduq, bizni untup qalmang dep sharpining üstidiki ayal qehrimanimiz nuzugum toghrisida melumat berdim. Emine xanim pütün sherqiy türkistanliq qérindashlirimizgha salam deng, allah yardem qilsun dédi.”

Munewwer özUyghur xanim dölet re'isi rejep tayyip erdoghan'ghimu kök sharpa teqdim qilghanliqini bayan qilip mundaq dédi: “Men pakistanliq ayaldin kéyinla rejep tayyip erdoghan'gha sharpa bériwétip, ‛bizni untup qalmang‚ dédim, dölet re'isimu ‛insha'alla‚ dep jawab béri.”

Igilishimizche, 110 etrapidiki xanim-qizlardin terkib tapqan hey'etni 7-mart chüshtin kéyin türkiye parlaménti insan heqliri komissiyonining bashliqi ömer serdar ependi bilen parlamént ezasi fatma ben xanim qobul qilghan. Mezkur uchrishishta 3 ayal söz qilghan bolup, bulardin biri Uyghur ayal munewwer özUyghur xanim iken. U, Uyghur diyarining nöwettiki éghir weziyiti toghrisida melumat bergenlikini bayan qildi.

Munewwer özUyghur xanim türkiye parlaménti insan heqliri komissiyonida Uyghur xanim-qizlirining weziyiti anglatqandin kéyin, ularning bu mesilige köngül bölidighanliqini bildürgenlikini éytti. 

Ayal hey'etler ichidin orun alghan Uyghur ayal pa'aliyetchi merziye kérem xanim ziyaritimizni qobul qilip, Uyghur ayallirigha wakaliten munewwer özUyghur xanimning körüshkenlikini, buning milliy dewa üchün paydiliq bolidighanliqini bayan qildi.

Sherqiy türkistan ma'arip we hemkarliq teshkilatining re'isi hidayetullah oghuzxan ependimu ziyaritimizni qobul qilip, Uyghur ayallirining dölet re'isi we türkiye parlaménti insan heq-hoquqliri komissiyonigha Uyghurlar weziyitini anglitishning zor ünümi bolidighanliqini ilgiri sürdi. 

Biz bu heqte melumat igilesh üchün türkiye parlaménti insan heq-hoquqliri komissiyonining bashliqi ömer serdar ependige téléfon qilghan bolsaqmu, yighinda bolghanliq sewebidin téléfonimizgha jawab bérelmidi. Munewwer özUyghur xanim sherqiy türkistan teshkilatliri munbirige wakaliten bu pa'aliyetke ishtirak qilghan bolup, bu Uyghur ayallirining tunji qétim türkiyening eng aliy rehbirige Uyghurlarning éghir weziyitini anglitishi hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.