Malayshiyadin xitaygha qayturulghan Uyghurlarning salahiyiti ashkarilandi

Ixtiyariy muxbirimiz éhsan
2015.07.16

Xitay zulumidin qéchip sherqiy jenubi asiyagha chiqqan Uyghurlardin, malayshiyada Uyghur musapirlarning terjimanliq ishlirini qilip bériwatqan 9 neper Uyghur yashning 2015-yili 2-ayning 7-küni malayshiya saqchiliri teripidin tutqun qilinip shu ayda xitaygha qayturulghanliqi otturigha chiqti. Bu 9 neper yashning bu yil 7-féwral küni oxshimighan orunlarda tuyuqsiz tutqun qilghanliqi melum boldi.

Bularning ichide abdusalam, abdullah, muhemmetjan, tursunjan, abdul'eziz, abdusalam, mehmutjan qatarliq 7 neper balining ismi we bezilirining resimi ashkarilandi.

Buning ichidiki yéqinda xitay da'iriliri teripidin ishlen'gen “Hijret qilip ghazat qilishning heqiqiy mahiyitini échip tashlash” dégen programmida türmide ziyaret qilin'ghan tursunjan malayshiyada abdullah bala terjiman dégen isim qollan'ghan.

Igilishimizche, tursunjan xoten shehiridin, 23 yash, u toluq otturini xitay ölkiliride oqughan, xitayche we in'glizche sewiyisi yuqiri bolup, oqush dawamida özining közligen mektipige yétish üchün aliy mektep imtihanigha tekrar qatnashqan.

Xitay da'irilirining xoten shehiride élip bériwatqan diniy, siyasiy zulumlirini körgen tursunjan normal pasport ishlitelmigechke, qachaq yollar arqiliq chet'elge chiqip shu yerde oqushni tamamlashni könglige pükken. U, 2014-yili 8-aylarda qachaq yol bilen malayshiyagha yétip barghan, u yerde özining in'gliz tili artuqchiliqi bilen Uyghur musapirlargha terjimanliq qilghan.

Bu jeryanda malayshiyada heriket qiliwatqan xitay bixeterlik tarmaqlirining diqqitini tartqan hemde 8 neper Uyghur yash bilen bille tutqun qilinip xitaygha élip kétilgen.

Neq meydanda abdusalam we muhemmetjan tutqun bolghanda shahit bolghan, isimni ashkarilashni xalimighan Uyghur yash ularning tutulush jeryanini anglatti.

Abdusalam xoten wilayitining xoten nahiyisi séghiz köl yézisidin bolup, malayshiyadiki Uyghurlarni orunlashturush, resmiyiti pütkenlerni yolgha sélish, öy ijare élish, kéreklik turmush buyumlirini yetküzüp bérishke mes'ul bolup, xitay bixeterlik saqchiliri teripidin uzun waqit közitilip tutqun qilin'ghan hemde türmide soraq jeryanida öltürülgenliki ilgiri sürülmekte.

Abdusalamni yéqindin tonuydighan ismini ashkarilashni xalimaydighan Uyghur yash öz bilgenlirini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.