Ай-юлтузлуқ көк байрақ норвегийәдики хитай әлчиханиси алдида йәнә ләпилдиди

Ихтиярий мухбиримиз айгүл йүсүп
2013-10-01
Share
xitay-bayrimi-norwegiye-namayishi.jpg Хитай дөләт байрими күни, уйғурлар хитай әлчиханисиниң алдиға йиғилип хитай һакимийитигә болған наразилиқини ипадиләп намайиш қилди. 2013-Йили 1-өктәбир, норвегийә.
RFA/Aygul

Норвегийәниң пайтәхти ослониң шәһәр мәркизигә йирақ болған бйдәл вәстрә акәрдики аһалиләр райониға җайлашқан хитай әлчиханисиниң алдида бүгүн шәрқий түркистанниң ай-юлтузлуқ көк байриқи йәнә ләпилдиди.

Норвегийә уйғур комитети тәшкиллигән бүгүнки намайишта уйғурлар хитай әлчиханисиниң алдиға йиғилип хитайлар үчүн дөләт байрими, уйғурлар үчүн матәм һесаблинидиған бу күнни, хитай һакимийитигә болған қаршилиқ вә наразилиқини ипадә қилидиған түрлүк шоарларни товлаш, нутуқ сөзләш вә тәшвиқат вәрәқилирини тарқитиш қатарлиқ паалийәтләр билән өткүзди. Намайиш башлиништин илгири шәрқий түркистан истиқлал марши қоюлди.

Бүгүнки намайишқа уйғур ислам мәркизиниң имами турғунҗан қаримму қатнашқан болуп у тәклип билән нутуқ сөзлиди.

Намайиш күнтәртипи бойичә тәшкилат рәһбәрлиридин пәрһат яқуп әпәнди вә җамаәт вәкиллиридин өмәрҗан акиму нутуқ сөзләп, уйғурланиң тарихта қурған мустәқил дөләтлириниң кимләрниң қоли билән қандақ вәйран қилинғанлиқи вә шундақла вәтән ичидики уйғурларниң нөвәттики интайин еғир вәзийити һәққидә тәпсилий мәлумат берип өтти.

Намайишқа қатнашқан ханимлардин асийәм һаҗим билән хәлчәм намайиш тәсиратлирини баян қилди.

Бүгүнки намайишқа йәнә венгирийәлик вә түркийәликләр һәм фалуңгуңчи хитайлар вәкилиму қатнашти. Зияритимизни қобул қилған венгирийәлик йигит гәрчә өзи уйғурлар өткүзгән бундақ бир намайишиға тунҗи қетим қатнашқан болсиму, лекин уйғурларни хели узундин бери тонуйдиғанлиқини, һун әвлади һесаблинидиған венгирийәликләрниң уйғурларни өзигә қериндаш дәп қарайдиғанлиқини шундақла шәрқий түркистанниң һаман бир күни мустәқил болуп хитай зулумидин қутулидиғанлиқини инглизчә вә венгирийә тилида һаяҗан билән сөзләп өтти.

Ниҗат әпәнди зияритимизни қобул қилип чәтәллик достларниң намайишқа қатнишиш сәвәбини чүшәндүрди. Норвегийә уйғур комитетиниң рәиси ниғмәт һаҗим зияритимизни қобул қилди.

Норвегийә вақти саәт бирдә башланған наразилиқ намайиши йәнә ғәзәплик товланған шоарлар билән ахирлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт