Обаманиң шиветсийә зиярити һарписида гуантанамодики уйғур тутқунлири мәсилиси қайта оттуриға чиқти

Ихтиярий мухбиримиз қутлан
2013-09-02
Елхәт
Пикир
Share
Принт
Иғинда шиветсийә парламент әзаси, йешиллар партийәсиниң гуруппа башлиқи мәһмәт қаплан гуантанамодики уйғур тутқунлири һәққидә сөз қилмақта (2013 - йил 31 - авғуст)
Иғинда шиветсийә парламент әзаси, йешиллар партийәсиниң гуруппа башлиқи мәһмәт қаплан гуантанамодики уйғур тутқунлири һәққидә сөз қилмақта (2013 - йил 31 - авғуст)
RFA/Qutlan


Америка прәзиденти баррак обаманиң шиветсийә зиярити һарписида скандинавийә әллиридики кишилик һоқуқ тәшкилатлири өз паалийәтлирини җиддийләштүрди. 31 - Авғуст, йәни шәнбә күни чүһтин кейин «2008 хитабнамиси» тәшкилати стокһолмдики абф - сарийида муһакимә йиғини уюштуруп гуантанамо тутқунлири мәсилисини өз ичигә алған кишилик һоқуқ муһакимисини қанат яйдурди.

Мәзкур муһакимә йиғинида гуантанамодики уйғур тутқунлири мәсилиси алаһидә тема сүпитидә оттуриға чиқти. «11 - Сентәбир вәқәси» дин кейин хитай һөкүмитиниң хәлқарадики терроризимға қарши омумий кәйпияттин пайдиллинип уйғурларниң һәққаний күрәшлирини қандақ бастурғанлиқи, гуантанамоға наһәқ қамалған уйғур тутқунлирини мәсилисиниң таки һазирғичә тәл - төкүс һәл болмиғанлиқи қатарлиқ мәсилиләр нуқтилиқ муһакимә қилинди.

Йиғин риясәтчиси мәзкур муһакиминиң түп мәқсити һәққидә тохтилип, уйғур тутқунлирини өз ичигә алған гуантанамо түрмисиниң әмәлийәттә америка башчилиқидики демократик әлләрниң кишилик һоқуқ тарихидики бир қара дағ икәнликини, обама тәхткә чиқипму өз вәдисини тәхичә әмәлийләштүрмигәнликини алаһидә тәкитләп өтти.

Муһакимә йиғинида даңлиқ зһурналист вә язғучи лена сундстрөм, явропа кишилик һоқуқ комитетиниң сабиқ даимий һәйити томас һаммарбәрг, упсала университетиниң профессори маттиас гардел вә шиветсийә парламент әзаси мәһмәт қаплан қатарлиқ кишиләр мәхсус темилар бойичә сөз қилди. Болупму парламент әзаси мәһмәт қапланниң гуантанамо түрмисигә қамалған уйғур тутқунлири һәмдә уларниң нөвәттики әһвали һәққидики баянлири йиғин әһлиниң диққитини тартти.

Мәһмәт қаплан сөзидә гуантанамо түрмисигә наһәқ қамалған уйғур тутқунлириниң гәрчә «гунаһсиз» лиқи елан қилинип дуняниң булуң - пучқақлириға тарқитиветилгән болсиму, лекин уларниң техичә нормал инсанларға хас һәқ - һоқуқлардин толуқ бәһриман болалмиғанлиқи, болупму әң ахирқи 3 нәпәр уйғур мәһбусниң һазирму гуантанамода туруватқанлиқини тәсирлик сөзләр билән баян қилди.

Мәһмәт қаплан сөзиниң ахирида обаманиң шиветсийә зиярити мунасивити билән гуантанамо тутқунлири мәсилисини оттуриға қоюшқа тиришидиғанлиқини, һөкүмәт, аммивий тәшкилатлар шундақла ахбарат вә түрлүк таратқуларниң бесими арқилиқ гуантанамо түрмисиниң тәлтөкүс тақилиши үчүн күрәш қилидиғанлиқини илгири сүрди.

Йиғиндин кейин зияритимизни қобул қилған мәһмәт қаплан суаллиримизға җаваб бәрди.У сөзидә баррак обаманиң мушу һәптә ичидә шиветсийәгә дөләт зияритигә келиши мунасивити билән шиветсийә парламент әзалириниң кишилик һоқуққа даир бир қисим тәклип - пикирләрни тәйярлаватқанлиқини, өзиниң гуантанамодики әң ахириқи 3 уйғурниң мәсилисини оттуриға қоюшқа тиришидиғанлиқини билдүрди.

У йәнә баш министәр фридрәк райинфелтниң обама билән болған көрүшүштә уйғур тутқунлирини өз ичигә алған гуантанамо мәсилисини оттуриға қоюш еһтималиниң барлиқини тилға алди.

Тәпсилатини аваз улиништиң аңлиғайсиз.

Пикирләр (0)
Share
Толуқ бәт