Osman turan ependi 500 kilométirliq piyade sepirini axirlashturdi

Ixtiyariy muxbirimiz erkin tarim
2017-05-03
Élxet
Pikir
Share
Print
Osman turan ependini milletchi heriket partiyesi bashliqi, sabiq mu'awin bash ministir dölet baghcheli ishxanisida qobul qildi. 2017-Yili 3-may, enqere.
Osman turan ependini milletchi heriket partiyesi bashliqi, sabiq mu'awin bash ministir dölet baghcheli ishxanisida qobul qildi. 2017-Yili 3-may, enqere.
RFA/Erkin Tarim

Xitayning Uyghurlargha élip bériwatqan bésim siyasitige bolghan naraziliqini bildürüsh we mezkur bésimni dunya jama'etchilikige, bolupmu türkiye jama'etchilikige tonushturush üchün 4-ayning 19-küni türkiyening antalya shehiridin türkiyening paytexti enqerege qarap piyade yolgha chiqqan Uyghur yash osman turan ependi bügün enqerege yétip keldi. Osman turan ependini milletchi heriket partiyesi bashliqi, sabiq mu'awin bash ministir dölet baghcheli ishxanisida qobul qildi. 14 Kün piyade yürüp türkiye paytexti enqerege yétip kelgen osman turan ependi milletchi heriket partiyesi re'isi dewlet baghchelige Uyghurlarning hazirqi weziyiti toghrisida melumat berdi. U, xitayning zulumining heddidin ashqanliqi, nurghun bigunah kishilerning türmige tashlan'ghanliqi, shuningdek türkiye dölitining Uyghurlargha ige chiqishi kéreklikini, rejep tayyip erdoghanning 5-ayning 12-küni xitaygha élip baridighan ziyariti jeryanida xitay rehberlirige Uyghurlargha élip bériwatqan bésim siyasitini toxtitishqa chaqirishini telep qildi. Dölet baghcheli ependi özining 15 yil burun Uyghur diyarigha barghanliqini, Uyghur mesilisini bilidighanliqini, Uyghurlargha ige chiqidighanliqini tekitlidi. Osman turan ependi axirida dölet baghcheli ependige sowghat berdi.

Uchrishish axirlashqandin kéyin, mikrofonimizni 500 kilométirliq yolni piyade mangghan osman turan ependige uzattuq. U, baghchelige Uyghurlar tartiwatqan derd-elemni yetküzgenlikini bayan qildi.

Bu seperge bashtin-axiri yardem qilghan milletchi heriket partiyesining antalya shöbe re'isi mustafa aqsoy ependi osman turan ependining 500 kilométirliq sepirini milletchi heriket partiyesining re'isi dölet baghcheli bilen körüshüp axirlashturghanliqini, buning "Sherqiy türkistan dewasi üchün paydiliq bolghanliqi" ni bayan qilip mundaq dédi: "Biz milletchi heriket partiyisi bolush süpitimiz bilen, qeyerde bir türkiy millet bésimgha, irqiy qirghinchiliqqa uchrawatqan bolsa uninggha ige chiqish bizning wezipimiz. Biz qérindash türkiy xelqlerni qollaymiz. U, özining muqeddes dewasini anglitish üchün antalyadin yolgha chiqqan idi.Uning sepiri tünügün axsham axirlashti. Bügün partiyemizning re'isi dölet baghcheli ishxanisida qobul qildi.Uyghur qérindashlirimizning derdini anglatti".

Mustafa aqsoy ependi 500 kilométirliq bu seperning meqsitige yetkenlikini bayan qilip mundaq dédi: "Bu seper metbu'atlardimu orun aldi. Bügündin tartip hem ijtima'iy taratqularda, téléwiziyelerdimu orun alidu. Menche meqsetke yétildi. Seper jeryanida uni her küni közitip turduq. Bundin kéyinmu dawamliq qérindishimizni qollaymiz."

Osman turan ependi 4-may küni hakimiyet béshidiki adalet we tereqqiyat partiyisi rehberliri hem bezi ammiwi teshkilat mes'ulliri bilen körüshkendin kéyin antalyege qaytip kétidighanliqini bayan qildi.

Zhurnalist tetqiqatchi azadjan bughra dunyada bu xil naraziliq pa'aliyetlirining nahayiti köp ikenlikini, osman turanning Uyghurlar arisidin tunji bolup, piyade yol yürüsh arqiliq Uyghurlarning ehwalini tonushturghan pa'aliyetchi ikenlikini tekitlidi.

Toluq bet