Xitayning pakistandiki Uyghur muhajirlargha xitay tilini téngishi qarshiliqqa uchridi

Muxbirimiz shöhret hoshur
2014-02-21
Share
Pakistan-ana-til-mektep-305 Pakistandiki ömer uyghur wexpi achqan uyghur ana til mektipi derisxanisidin bir körünüsh.
RFA Photo / Erkin Tarim


Pakistandiki ömer Uyghur wexpi 5 yilning aldida ana til mektipi échip, bir türküm Uyghur üsmür - balilirini terbiyileshke bashlighan idi.

Bu ishtin endishige chüshken pakistandiki xitay elchixanisi özining iqtisadiy we diplomatik küchini ishqa sélip, rawalpindidiki bir pakistan mektipi bilen hemkarlashqan we sheher etrapidiki pütün Uyghur oqughuchilarni shu mektepke yighqan ؛ bu arqiliq Uyghur ana til mektipining kéngiyip kétishining aldini almaqchi bolghan. Deslipide bu mektepte Uyghur tilimu ögitilidighanliqi heqqide wede bergen xitay elchixana xadimliri, bu wedisige emel qilmighanning üstige, ötken ayda mekteptiki Uyghur balilirigha xitay tilini ögitish üchün kitab tarqatqan؛ bu ehwaldin xewer tapqan ömer Uyghur wexpi we Uyghur ata - anilar yéqinda mezkur mektepke bérip mektep rehberlirige naraziliq bildurdi we bu heqte mexsus bir bayanatmu élan qildi.

Töwende muxbirimiz shöhret hoshurning bu heqte teyyarlighan programmisini anglaysiler.

Ömer Uyghur wexpini ana til mektipini taqashqa buyrighan pakistan dölet bixeterlik xadimliri, Uyghur muhajirlargha ana tilni ögitish ishini xitay elchixanisi bilen hemkarlishiwatqan mektepning dawamlashturidighanliqini éytqanidi. Eslide ana til mektipide ömer Uyghur wexpini qurghuchi aka - ukilarning we ularning dostlirining perzentliri oquwatqan bolup, xitay elchixanisi bular bilen riqabetliship rawalpindidiki barliq Uyghur balilarni bir mektepke yighqandin kéyin, Uyghur baliliri ilgirike nisbeten köprek öz - ara uchrishish we shara'iti yaxshiraq mektepte oqush pursitige érishidu. Bu ehwalni ijabiy bir netije dep qarighan ömer Uyghur wexpi, gerche mektepte ana til ögitilmisimu ata - anilarni perzentlirini bu mektepke bérishtin tosumaydu. Melum bolushiche, ömer Uyghur wexpi bilen qarshiliship barliq Uyghur oqughuchilarni bir mektepke yighip qoyghan xitay elchixanisi, bu ishta özlirining közge körünerlik nepke érishelmigenlikini hés qilip, Uyghur muhajirlargha qarshi yéngi bir heriketke ötidu. Bu heriket mektep bilen hemkarliqidin paydilinip Uyghur oqughuchilargha xitay tilini mejburiy ögitish we bu arqiliq muhajir Uyghur ösmürliride jungxu'a éngini yétildürüsh. Ata - bowilirining del mushu aqiwettin saqlinish üchün hijret qilghanliqini közde tutqan bir qisim Uyghur ata - anilar mezkur mektepke yétip bérip mektep rehberlirige naraziliqini bildürdi. Ata - anilar mektep rehbelirini eger mekteptiki Uyghur balilirigha xitayche oqutulsa özlirining hergiz qarap turmaydighanliqi, qolidin kelgen barliq chariler bilen xitayche oqutushni toxtidighanliqi heqqide agahlandurdi.

Melum bolushiche, xitay elchixanisi meblegh sélip qurulushini kéngeytken mezkur mektepning nami“Pik monty sikol” bolup, bu mektepte nöwette 700din artuq oqughuchi oquydu, bularning ichide az dégende 150 neper oqughuchi Uyghur muhajirlarning perzentliri.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet