"Lagér" din qachqan peyzulla utuqning tutulghan emes, étiwétilgenlik xewiri chiqti

Muxbirimiz shöhret hoshur
2018-08-03
Élxet
Pikir
Share
Print
Ghuljidiki "Terbiyelesh merkizi" din qachqan gumandar peyzulla utuq heqqide xitay saqchiliri chiqarghan tutush buyruqi.
Ghuljidiki "Terbiyelesh merkizi" din qachqan gumandar peyzulla utuq heqqide xitay saqchiliri chiqarghan tutush buyruqi.
RFA/Shohret Hoshur

Biz 4 ayning aldida xitay da'iriliri teripidin doxturxanidin qachqanliqi ilgiri sürülgen, ahaliler bolsa lagérdin qachqanliqini melum qilghan qorghas kökdalaliq peyzulla utuqning bir heptilik axturush opératsiyesidin kéyin tutqun qilin'ghanliqi heqqide xewer bergen iduq. Tünügün yeni 2-awghust küni "Bitter wintér" yeni "Zimistan" namliq xelq'araliq axbarat zhurnili, peyzulla utuqning opératsiyening axirqi küni neq meydanda étiwétilgenlikini xewer qildi. Bu xewerdiki bezi tepsilatlar, peyzulla utuq délosidiki bir qisim éniqsiz nuqtilarni aydinglashturdi. Töwende muxbirimiz shöhret hoshurning bu heqte teyyarlan'ghan programmisi diqqitinglarda bolidu.

Xitay saqchiliri chiqarghan tutush buyruqida, peyzulla utuqning Uyghur rayonidiki ishlepchiqirish qurulush armiyisining 66-polk doxturxanisidin qachqanliqi, uning doxturxanigha kirishtin burun at oghrilap tutulghanliqi bayan qilin'ghan idi؛ "Zimistan" zhurnilining 2-awghusttiki bu heqtiki xewiride bayan qilinishiche, peyzulla utuq 2017 ‏-yili 5 ‏-ayda atalmish terbiyeleshke ekitilip 3 aydin kéyin qoyup bérilgen؛ u bu yil 4-ayda terbiyeleshke yene bir qétim chaqirtilghan. Peyzulla lagérgha bérishtin özini qachurup, özi turuwatqan 64-polktin 63‏-polk tewelikige yoshurun ötken shu yerdiki bir kichik aralda mökünüp turushni pilanlighan we shu aralgha ötüwélish üchün derya boyidiki bir charwichidin étini sorap turghan. Charwichi razimenlik bilen étini peyzullagha bergen we arqidin étining qayturulmasliqidin endishe qilip ehwalni ündidar arqiliq a'ilisi we dostlirigha bildürgen. Ündidardiki bu uchur arqiliq peyzullaning lagérgha bérishtin qéchishni pilanlawatqanliqini bayqighan xitay saqchiliri derhal neq meydan'gha yétip bérip, peyzullani tutqan؛ bu chaghda peyzulla özini tigh bilen kaniyidin zeximlendürüwalghan. Xewerde yene bayan qilinishiche, saqchilar yaridar peyzullani doxturxanigha élip bérip dawalighan. Melum bolushiche, 16‏-aprél küni doxturxanigha apirilghan peyzulla, 27-aprél künige kelgende salametlikide eslige kélish bolghan we özige qarawatqan saqchi uxlap qalghan peytte yeni etigen sa'et 5 te doxturxanidin qéchip ketken. 

Xitayning peyzulla heqqidiki tutush buyruqida, uning doxturxanidin bimar kiyimi we terlik bilen chiqip ketkenliki yézilghan bolsimu, emma uning ilgiri lagérgha élip bérilghanliqi we tekrar lagérgha apirilishqa uqturush barghanda lagérgha apirilishtin özini qachurghanliqi qatarliq muhim pakitlar tilgha élinmighan. Tutush buyruqida, u bir at oghrisi dep tonushturulghan bolsimu, emma uni tutup bergüchilerge 100 ming yüen mukapat bérilidighanliqi eskertilgen we pütün amma seperwerlikke chaqirilghan؛ yip uchini yoshurghanlarning jazalinidighanliqi uqturulghan. "Zimistan" zhurnilining 2-awghusttiki xewiride peyzulla utuqni izdesh üchün 70 ming kishining seperwer qilin'ghanliqi, teweliktiki doxturxana we mekteplerning taqalghanliqi bayan qilin'ghan. Zhurnal bu tepsilatlar arqiliq xitayning tutushqa buyruqida déyilgen peyzullani at oghrilidi dégen pakitning yasalma ikenliki ilgiri sürülgen. Radiyomiz igiligen eyni chaghdiki uchurlardimu, peyzulla utuqni izdesh üchün ili tewesidiki asasliq yollarning, bolupmu qorghas tewesidiki derya, étiz we dönglerning axturulghanliqi, axturushqa qoralliq küchlerdin bashqa teweliktiki amminingmu seperwer qilin'ghanliqi delillen'gen idi. 

"Zimistan" zhurnilining xewiride, peyzullaning ilgiri qaysi lagérgha apirilghanliqi we bu qétimmu qaysi lagérgha apirilmaqchi ikenliki bayan qilinmighan. Bizning ilgiriki éniqlashlirimiz dawamida, ahaliler, peyzulla tewe bolghan 64-polk, 14-rota tewesidiki kishilerning 66 ‏-polktiki lagér ornida ishlitilgen bir doxturxanigha apiriliwatqanliqini melum qilghan idi. Xitayning peyzulla heqqidiki tutush buyruqida, uning 66 ‏-polktiki bir doxturxanigha apirilghanliqi tilgha élin'ghan bolsimu, u doxturxanining lagér ornida ishlitiliwatqanliqi bayan qilinmighan. "Zimistan" zhurnilida yene déyilishiche, peyzulla utuq doxturxanidin qachqandin kéyin, Uyghur rayonining partkom sékrétari chén chüen'go peyzulla utuqning ya ölüki ya tirikini derhal tépishni buyrughan. Radi'oyimizning eyni chaghdiki éniqlashliri dawamida, yerlik wezipidarlar, peyzulla utuqning 1‏-aprél küni qorghas nahiyisining "Lyangfanchang", yeni uruqchiliq meydanida tutulghanliqini bayan qilghan idi. 

"Zimistan" zhurnilining xewiride, uning mezkur uruqchiliq meydanidiki bir köwrükning astidin tépilghanliqi we uni qorshawgha alghan saqchilarning peyzullani neq meydanda étiwetkenliki bayan qilin'ghan. Mezkur zhurnalning xewiride, weqedin kéyin tewelikte wezipe ötewatqan bir türküm saqchi, kadir we emeldarlarning wezipisidin élip tashlan'ghanliqi bayan qilin'ghan ؛ emma bulargha bérilgen bu jazaning peyzulla utuqqa heddidin artuq küch qollan'ghanliqi, yeni neq meydanda étiwetkenliki üchün bérilgen we yaki peyzulla utuqni doxturxanidin qachurup qoyghanliqi we 5 kün'giche tutalmighanliqi üchün bergenliki xewerde eskertilmigen. 

Hörmetlik radi'o anglighuchilar, xewerdiki eng muhim bir nuqta, peyzulla utuqning ilgiri lagérdiki mezgilde némilerni bashtin kechürgenliki, rayon weziyitide qéchip qutulushning müshküllükini bilip turup yene néme üchün qéchishqa urun'ghanliqi, tigh bilen özini zeximlendürgen chéghida rastinila ölüwélishni oylighan we yaki doxturxanigha apirilish pursitini kütkenliki we uning qéchish pilanida özi turuwatqan tewelikke qoshna bolghan qazaqistan qéchip chiqish niyiti bolup-bolmighanliqi melum emes.

Pikirler (1)
Share

Isimsiz oqurmen

Bu xewerde:

''mezkur zhurnalning xewiride, weqedin kéyin tewelikte wezipe ötewatqan bir türküm saqchi, kadir we emeldarlarning wezipisidin élip tashlan'ghanliqi bayan qilin'ghan ؛ emma bulargha bérilgen bu jazaning peyzulla utuqqa heddidin artuq küch qollan'ghanliqi, yeni neq meydanda étiwetkenliki üchün bérilgen we yaki peyzulla utuqni doxturxanidin qachurup qoyghanliqi we 5 kün'giche tutalmighanliqi üchün bergenliki xewerde eskertilmigen. "

Esli xewerde:
We also learned that the Chinese Communist Party was not happy that it took so long to find and kill Pazil Utuk, and punishments were applied. Thirty-two people in the 64th Regiment were penalized to varying degrees, from the leading cadres down to the company leaders. Police force cadres were stripped of their positions and Party memberships, and the Special Police Regiment leaders were all fired. The Political and Legal Committee secretary and the bureau director were also let go. All were given disciplinary punishments, and some were even detained.

HTTPS://BITTERWINTER.ORG/UYGHUR-MUSLIM-SHOT-DEAD-AFTER-MASSIVE-MANHUNT/

==================
Ilan'gha put sizish zürür emes.

==================

Aug 04, 2018 01:15 PM

Toluq bet