Pezilet bekrining qeshqer 4 ‏-ottura mektep "Yépiq terbiye lagéri" da ikenliki éniqlandi

Muxbirimiz shöhret hoshur
2018-05-04
Élxet
Pikir
Share
Print
Xizmette aktip bolmidi dégen bahane bilen "Terbiyilesh lagéri" gha élip kétilgen qeshqer yarbagh kocha bashqarmisining sékrétari pezilet bekri.
Xizmette aktip bolmidi dégen bahane bilen "Terbiyilesh lagéri" gha élip kétilgen qeshqer yarbagh kocha bashqarmisining sékrétari pezilet bekri.
RFA

Weziyettin xewerdar kishilerdin biri bu yil 1 ‏-ayda tutqun qilin'ghan qeshqer yawagh kocha bashqarmisining partkom sékrétari pezilet bekrining qeshqer shehiridiki dölet amanliq saqchilirigha tewe bir qamaqxanidin béshigha qara xalta kiydürülgen halette namelum bir jaygha yötkep kétilgenliki heqqide uchur yetküzgen idi. Muxbirimizning eng yéqinqi éniqlashliri dawamida, uning qeshqer sheherlik 4 ‏-ottura mektepte tesis qilin'ghan yépiq terbiye lagérida ikenliki delillendi.

Biz ötken aylardiki éniqlashlirimiz dawamida qeshqer yawagh kocha bashqarmisining sabiq sékrétari pezilet bekrining tutqun qilin'ghanliqi delillen'gen bolsimu, emma uning qaysi jayda tutup turuluwatqanliqi heqqide éniq melumatqa érishelmigen iduq. Bizge bu heqte uchur yetküzgüchi uning dölet amanliq saqchiliri teripidin tutulghanliqini inkas qilghan bolsimu, uning qaysi qamaqxana yaki lagérda ikenliki heqqide melumat bermigen. Bu hepte qeshqer weziyitidin kishilerdin biri radiyomizgha uchur yollap, pezilet bekrining ötken hepte qeshqer sheherlik dölet amanliq saqchilirigha tewe bir qamaqxanidin namelum bir jaygha élip kétilgenlikini melum qildi. Qeshqerdiki saqchi xadimlirigha qarita élip barghan éniqlashlirimiz dawamida, pezilet bekrining nöwette qeshqer sheherlik 4 ‏-ottura mektepte tesis qilin'ghan "Yépiq terbiye lagéri" da ikenliki ashkarilandi. 

Weziyettin xewerdar kishi pezilet bekri namelum jaygha yötkelgende béshida qara xalta barliqini eskertken. Saqchi xadimliri bu heqte éniq bir nerse déyelmidi. Emma ilgiri igiligen éniqlashlirimiz dawamida, ghulja nahiyisidiki "Terbiyilesh lagéri" gha ekilin'genlerning köpinchisining béshigha qara xalta kiydüriliwatqanliqini bayan qilghan. Yopurgha nahiyisidiki bir saqchi xadimimu 19 yashliq tutqun gülnar emetning béshigha qara xalta kiydürülgenlikini, emma saqchilarning jem'iyetke yaman tesir bermeslik üchün gülnar emetke qara xaltini mashinigha chiqip bolghandin kéyin kiydürgenlikini ilgiri sürgen idi.

Ilgiriki xewerlirimizdin, bu nöwet béshigha qara xalta kiydürülüp qamaqxanidin "Terbiyilesh lagéri" gha yötkelgen pezilet bekrining sékrétar we siyasiy komissar mezgilide béshigha qara xalta kiydürülgen boway-momaylarni körüp hésdashliq qilghanliqi we bu héssiyatini yoshuralmighanliqi üchün uning tutqun qilin'ghanliqi melum idi.

Toluq bet