Пәзиләт бәкриниң қәшқәр 4 ‏-оттура мәктәп "йепиқ тәрбийә лагери" да икәнлики ениқланди

Мухбиримиз шөһрәт һошур
2018-05-04
Share
Pezilet-Bekri.JPG Хизмәттә актип болмиди дегән баһанә билән "тәрбийиләш лагери" ға елип кетилгән қәшқәр ярбағ коча башқармисиниң секретари пәзиләт бәкри.
RFA

Вәзийәттин хәвәрдар кишиләрдин бири бу йил 1 ‏-айда тутқун қилинған қәшқәр явағ коча башқармисиниң партком секретари пәзиләт бәкриниң қәшқәр шәһиридики дөләт аманлиқ сақчилириға тәвә бир қамақханидин бешиға қара халта кийдүрүлгән һаләттә намәлум бир җайға йөткәп кетилгәнлики һәққидә учур йәткүзгән иди. Мухбиримизниң әң йеқинқи ениқлашлири давамида, униң қәшқәр шәһәрлик 4 ‏-оттура мәктәптә тәсис қилинған йепиқ тәрбийә лагерида икәнлики дәлилләнди.

Биз өткән айлардики ениқлашлиримиз давамида қәшқәр явағ коча башқармисиниң сабиқ секретари пәзиләт бәкриниң тутқун қилинғанлиқи дәлилләнгән болсиму, әмма униң қайси җайда тутуп турулуватқанлиқи һәққидә ениқ мәлуматқа еришәлмигән идуқ. Бизгә бу һәқтә учур йәткүзгүчи униң дөләт аманлиқ сақчилири тәрипидин тутулғанлиқини инкас қилған болсиму, униң қайси қамақхана яки лагерда икәнлики һәққидә мәлумат бәрмигән. Бу һәптә қәшқәр вәзийитидин кишиләрдин бири радийомизға учур йоллап, пәзиләт бәкриниң өткән һәптә қәшқәр шәһәрлик дөләт аманлиқ сақчилириға тәвә бир қамақханидин намәлум бир җайға елип кетилгәнликини мәлум қилди. Қәшқәрдики сақчи хадимлириға қарита елип барған ениқлашлиримиз давамида, пәзиләт бәкриниң нөвәттә қәшқәр шәһәрлик 4 ‏-оттура мәктәптә тәсис қилинған "йепиқ тәрбийә лагери" да икәнлики ашкариланди. 

Вәзийәттин хәвәрдар киши пәзиләт бәкри намәлум җайға йөткәлгәндә бешида қара халта барлиқини әскәрткән. Сақчи хадимлири бу һәқтә ениқ бир нәрсә дейәлмиди. Әмма илгири игилигән ениқлашлиримиз давамида, ғулҗа наһийисидики "тәрбийиләш лагери" ға әкилингәнләрниң көпинчисиниң бешиға қара халта кийдүриливатқанлиқини баян қилған. Йопурға наһийисидики бир сақчи хадимиму 19 яшлиқ тутқун гүлнар әмәтниң бешиға қара халта кийдүрүлгәнликини, әмма сақчиларниң җәмийәткә яман тәсир бәрмәслик үчүн гүлнар әмәткә қара халтини машиниға чиқип болғандин кейин кийдүргәнликини илгири сүргән иди.

Илгирики хәвәрлиримиздин, бу нөвәт бешиға қара халта кийдүрүлүп қамақханидин "тәрбийиләш лагери" ға йөткәлгән пәзиләт бәкриниң секретар вә сиясий комиссар мәзгилидә бешиға қара халта кийдүрүлгән бовай-момайларни көрүп һесдашлиқ қилғанлиқи вә бу һессиятини йошуралмиғанлиқи үчүн униң тутқун қилинғанлиқи мәлум иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт