Қарақаш кәнт аманлиқ мудири: ака-ука гумандарлардин акиси бир йил қамақта ятқан, инисиниң паспорти тартивелинған

Мухбиримиз шөһрәт һошур
2017.01.02
urumchi-partlash-bazar-qarshiliq-2.jpg Хәлқ бағчиси йенидики ават базарда бомба билән һуҗум қилиш вәқәси йүз бәргән. 2014-Йили 22-май, үрүмчи.
EYEPRESS NEWS

Мухбиримизниң қарақаш партком бинасиға һуҗум қилиш вәқәсиниң тәпсилати һәққидики ениқлашлири давамида, вәқәдә рол алған ака-ука гумандарлардин акисиниң бурун һәқсиз бир йил қамақта ятқанлиқи, инисиниң икки ай аввал паспорти тартивелинғанлиқи айдиңлашти. Бу пакитларни ашкарилиған җүмә базар кәнт аманлиқи мудири, гумандарларни һәрикәткә кәлтүргән қозғатқуч сәвәбләр һәққидә һазирчә бир немә дейәлмәйдиғанлиқини, әгәр пәрәз қилишқа тоғра кәлсә, юқириқи икки пакитни әскә алидиғанлиқини билдүрди.

28-Декабир күни йүз бәргән қарақаш парткомға һуҗум қилиш вәқәсиниң тәпсилатини ениқлишимиз давамида, аһалиләрдин бири ака-ука гумандарлардин тохтимәмәт турсунниязниң буниңдин 11 йил аввал сәвәбсиз һалда тутқун қилинғанлиқини вә қамақханиға әкитилип 6 айғичә сорақму қилинмиғанлиқини баян қилди. Униң йәнә баян қилинишичә, тохтимәмәт турсуннияз гунаһсизлиқи айдиңлишип қоюп берилгәндин кейин қамақханида көргән-билгәнлири һәққидә қолум- қошнилириға аччиқ вә тәсирлик һекайиләрни сөзләп бәргән; һәтта бир қетимда, мән қамақта ятмидим, университетни пүттүрдүм, дәп кинайә қилған. У шу йилларда өзиниң бир йил һәқсиз қамақханида йетиш арқилиқ йеңи бир адәм болуп чиққанлиқини баян қилған. Униңдики мушу наразилиқ кәйпиятиға асасән даириләр у вә униң уруқ-туғқанлирини нуқтилиқ аилә қилип бекиткән вә назарәт астиға алған. Аһалиләрдин бири баян қилған бу учурниң тоғрилиқини җүмәбазар кәнт аманлиқ мудириму дәлиллиди.

Бу аманлиқ мудириниң баян қилишичә, ака-ука гумандарлардин иниси нурмәмәт турсунниязниң илгири һечқандақ җинайәт хатириси болмиған. У бу йилниң бешида хотәндә деһқанларға паспорт беҗирип бериш бәлгилимиси чиқирилғанда достлири қатарида берип паспорт алған, әмма узун өтмәй паспортлар йиғивелинған. Мәлум болушичә, җүмәбазар кәнтидинла 39 кишиниң паспорти йиғивелинған. Нурмәмәт турсуннияз паспортини сақлап қелишқа тиришип баққан вә ахири амал болмиғанда қайтуруп бәргән.

Аманлиқ мудири делониң сақчилар тәрипидин тәкшүрүлүватқанлиқини вә тәпсилатиниң өзлиригә билдүрүлмәйватқанлиқини ашкарилиди вә уларниң хитай һакимийитигә наразилиқиниң сәвәблиридин мисал сүпитидә өзлири иҗра қилған юқириқи икки ишни тилға алди.

Муһаҗирәттики уйғур көзәткүчиләр, уйғур районида йүз бәргән қаршилиқ һәрикәтлиридә хитай һакимийитини қобул қилмаслиқтәк омумий бир сәвәбтин башқа йәнә, көп һалларда, һәр бир вәқәниң өзигә хас конкрет бир яки бирқанчә қозғилиш сәвәби барлиқини илгири сүрмәктә. Мушу нуқтидин қарақаш партком бинасиға һуҗум қилиш вәқәсиниң билишкә тегишлик йәнә көп тәрәплири сир пети турмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.