Qaraqash nahiyelik da'iriler qassaplarning pichaqlirigha 15 santimétirliq ölchem békitken

Muxbirimiz qutlan
2015.06.17
Share on WhatsApp
Share on WhatsApp
yengisar-pichaq.jpg Yéngisardiki melum bir pichaq dukinidiki Uyghur hünerwen ustilar.
wetenmenziriliri.blogspot.com


Nöwette Uyghur élining jenub we shimalida da'irilerning pichaq, qingraq, palta qatarliq tighliq saymanlargha bolghan sezgürlükining hessilep éship ketkenliki melum bolmaqta.

Pichaq türidiki tighliq eswaplarning yéqinqi birqanche yillardin buyan xitay hökümet memurliri bilen amanliq xadimlirini qattiq teshwishke sélipla qalmastin, belki yene rayondiki köchmen xitay puqralirinimu éghir derijide  xatirjemsizlendüriwatqanliqi bilinmekte.

Neq meydandin igiligen uchurlardin qarighanda, Uyghur élining jenubidiki qeshqer, yeken, xoten qatarliq jaylarda yerlik hökümet organliri tighliq eswaplarni cheklesh we kontrol qilish üchün kishini heyran qalduridighan bimene tedbirlerni yolgha qoymaqtiken.

Bu yil 5-ayning axiri qaraqash nahiyesining zawa yézisida 6 neper pida'iyning xitay charlighuchi saqchi etritige özliri yasiwalghan bomba bilen hujum qilishi shundaqla xoten nahiyesining layqa yézisida wang famililik mu'awin yéza bashliqining pichaqlap öltürülüshi da'irilerning tighliq saymanlargha bolghan sezgürlük késilini téximu ulghaytiwetken.

Yéqinda qaraqash nahiyesining zawa yéza bazirida qassapchiliq qilidighan bir kishining radiyomizgha bildürüshiche, nahiyelik partkom buyruq chiqirip Uyghur qassaplarning birdek 15 santimétirdin qisqa pichaq ishlitishini békitken. Bu belgilime hazir qaraqash nahiye bazirida qattiq ijra qilinmaqtiken.

Pichaq - Uyghurlar hayatida kem bolsa bolmaydighan tighliq sayman. Tarixtin buyan Uyghur erliri yénigha pichaq asidighan adetni shekillendürgen. Bu bir tereptin pichaqning kündilik turmushtiki ishlitilish qimmitining yoqiriliqidin bolsa, yene bir tereptin erlerning erlik jasaritini namayen qilidighan bir bézek buyumi süpitide ishlitilgenlikidin bolghan.

Halbuki, 90-yillardin bashlap xitay da'irilirining Uyghur pichaqlirigha bolghan kontrolluqi hessilep küchiyishke bashlighan. Buning netijiside Uyghurlarning eng nepis we eng dangliq qol hüner sen'itining biri hésablan'ghan pichaqchiliq kespi cheklimige uchrighan. Hetta xitay taratqulirimu ötken yilidin buyan dunyagha dangliq yéngisar pichaqliqi we uning sodisining zawalliqqa yüzlen'genlikini xewer qilghan.

Yéqinda türkiyege kélip yerleshken bir Uyghurning ötken yili yeken bazirida körgen bir échinishliq hékayisi bu nuqtini yenimu delilleydu. Uning bildürüshiche, 2014-yili 10-ayning axiri yeken baziridiki bir Uyghur samsipez piyaz toghrawatqan qingriqi bilen samsixanidin ikki qedem sirtqa chiqishigha étip tashlan'ghan. Bu ehwal xitay qoralliq küchlirining Uyghurlarning qolidiki tighliq saymanlargha bolghan sezgürlükining qaysi derijige barghanliqini körsitip bermekte.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.