Qaraqashning zawa yézisida 6 neper pida'iy xitay charlighuchi saqchilirigha bomba bilen hujum qilghan

Muxbirimiz qutlan
2015-05-29
Share
xoten-maniwer-tanka-herbiy.jpg Xitay qoralliq küchlirining kocha charlap yürgen körünüshi. 2014-Yili 6-iyun, xoten.
AFP


28-May seherde shiwétsiyediki "Sherqiy türkistan teshwiqat merkizi" xewer bérip xotenning qaraqash nahiye zawa yézisida 6 neper Uyghur pida'iyning xitay saqchiliri bilen toqunushqanliqini ilgiri sürgen idi.

Radiyomiz bu uchurgha asasen qaraqash nahiyesining zawa yézisigha téléfon qilip, ehwaldin xewerdar kishilerdin neq meydan melumat aldi.

Zawa yézisidiki ehwaldin xewerdar kishilerning bayanliri bu qétimliq hujum weqesining rastliqini, zawa yézisining hazirghiche jiddiy halette ikenlikini delillidi.

Ziyaritimizni qobul qilghan shu yerlik bir qizning bildürüshiche, buningdin bir hepte ilgiri birqanche Uyghur pida'iy zawa yézisining yéngi'östeng kentide wezipe ötewatqan xitay charlighuchi saqchi etritige özliri yasighan bomba bilen hujum qilghan. Hujum jeryanida 2 neper pida'iy xitay saqchiliri teripidin étip öltürülgen. Qalghan 4 neper pida'iy neq meydandin chékinip zawa yézisining melum jayigha yoshurun'ghan. Shu künila 4 neper pida'iyning resimi kocha-kochilargha chaplinip, tutush buyruqi chiqirilghan. Qaraqash nahiyelik radi'o uzélimu bu heqtiki tutush buyruqini élan qilghan.

Zawa yézisida olturushluq yene bir yerlik Uyghur er ziyaritimizni qobul qilip, özining téxi emdila 5 kéche-kündüzlük közetchilik wezipisini tügitip qaytip kelgenlikini bildürdi.

Uning bayan qilishiche, hujum weqesi 24-may (düshenbe) yérim kéche bilen 25-may (seyshenbe) tang seher ariliqida yüz bergen. Zawa yézisining igiz'ériq, bashaqchi we toghiya kentliridin teshkillen'gen 6 neper Uyghur pida'iy yéngi östeng kentide charlash élip bériwatqan xitay saqchilirigha özliri yasighan bomba bilen hujum qilghan. Hujum jeryanida 2 neper pida'iy étip öltürülgen. Xitay saqchiliridin ölgen we yaridar bolghanlarning bar-yoqluqi heqqidiki xewer qattiq kontrol qilin'ghan bolghachqa, yerlik xelq bu heqte éniq uchurgha érishelmigen.

Ismini ashkarilashni xalimaydighan bu kishining bidürüshiche, shu küni seherdin bashlap pütkül zawa yézisi jiddiy haletke ötken. Qéchip ketken 4 neper pida'iyning resimi zawa yézisining herqaysi kentlirige chaplan'ghan. Yéziliq partkom buyruq chüshürüp, zawa yézisidiki nechche on ming ammini mejburiy heriketlendürgen we 4 neper pida'iyni izdep tutush opératsiyesi élip barghan.

Uning yenimu ilgiriligen halda ashkara qilishiche, qéchip yürgen 4 neper pida'iydin ikkisining ismi abdurahman abduxélil bilen nebi abdulla iken, qalghan ikkisining ismi melum emes. Ularning 5 kündin buyan tutulghan yaki tutulmighanliqi shundaqla étip tashlan'ghan yaki téxiche hayat ikenliki heqqide hazirghiche éniq xewer yoqken.

Bu heqtiki yéngi melumatlar kéyinki programmilirimizda dawamliq diqqitinglarda bolidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet